Thu dik lo hmanga BJP tihhmingchhiatna lam hawi thehdarhtute lakah March 12 khan BJP Mizoram Thalai chuan Cyber Crime Police Station-ah FIR an thehlut.
BJP Mizoram Thalai Hqrs. thuchhuak chuan, inthlan dawn hnaih apianga BJP beihna tura thudik lo vawrhdarh ching party thenkhat atanga chhuak ni ngeia hriat a awm thin chu pawi an tih thu a sawi a. Politics chu sakhuana nena kaihkawp luih tum a, India ram state thenkhata hnamdang insawisakna video/ thlalak ho chu remchanga hmanga Mizo Kristiante rilrem zawng a nih vanga Kristiante tawrhna anga BJP sawrkar tih hmingchhiatna atan dawt an vawrh thin tih a sawi.
Hei hi Mizo mipui zahlohna leh hmuhsitnaah an ngai mai niloin, kan sakhuana pawh inbumnaah an chantirah an ngai tih sawiin, ‘Tunhnaia social media-a an thehdarh, Uttar Pradesh-a BJP-ten Kristian pa an sawisak rawn ni awm taka an thehdarh chu thu diklo niin, Punjab-a misual, rukru nia puh an sawisakna zawk a ni a, he video tawi thehdarh pawh hi kohhran thenkhat lo tawngtaipui hialte an awm niin a lang a, kohhran thlengin dawt politics-in min bum tel hi a pawi kan ti takzet a ni,’ a ti.
Heng thudik lo thawndarhtute hi dan anga a tul anga na taka hremna pe turin BJP Mizoram Thalai chuan thuneitute an ngen tih sawiin, tun hnuah thudiklo leh dawt hmanga Mizo mipui bum kan nih tawh lo nan, na taka an chunga hremna pe turin an ngen tih a sawi.
Thudik lo thehdarhtute lakah BJP-in FIR thehlut
