Thuneiute an intiam hnuah Kuki-ten kawngpui dan titawp

Thuneiute an intiam hnuah Kuki-ten kawngpui dan titawp
Manipur-a Kuki-Zo pawl, Committee on Tribal Unity (CoTU) chuan Kangpokpi district thuneitute atanga thu tiam an hmuh hnuah Thawhtanni tlai atang khan national highway pahnih an dan chu tihtawp an rel tih an sawi.
CoTU chuan Kangpokpi police officer-ten ‘Kuki-Zo khia zawng zawng himna’ leh district chhunga chengte tan hma an lak tur thu an tiam tih a sawi.
Officer hian ‘vengtute kaihhruai (escort) ruahmanna felfai tak hmanga Kuki-Zo khua zawng zawng, a bikin Leimakhong, Tuilang IT kawngpui, Kangchup, Bungpi leh Kangpokpi district chhunga chhiat tawk hmun dangte hnenah ni tin mamawh leh tulte him leh tla taka phurh thlen a nih theih nan hma lak’ a remti tih CoTU chuan a sawi bawk.
Heng bakah hian May 13-a kohhran hruaitu pathum thahnaah inhnamhnawihte chu man leh thubuai siamsak vek turin a phut nawn leh bawk.
Kuki pawl hian Pathianni tlai dar 4:00 atang khan national highway pahnih, Imphal-Dimapur (NH-2) leh Imphal-Silchar via Jiribam (NH 37)-ah chu tiam chin awm lovin an dang tan a. He an hmalakna hi Leimakhong-Kangchup-a venhim hna thawktuten thlei bik neia beihpui an thlak nia an sawi duh loh lantir nan a ni.
Kangpokpi district-ah hian June 1-a Kuki-ten an ruk bo nia sawi, Naga mi paruk ruang chhe tawk tak hmuh a nih khan lak chhuah a nih hnuah venhimna hna thawh a ni.
Pathianni khan Kangpokpi district-a Leilon Vaiphei leh Konsakhul khuaa hmun hnih-a venhim hna thawktuten mi an zawn laiin ralthuam keng tu tih hriat lohte nen an inkap a, nasa takin inkap tawn mah se thi leh hliam an awm lo niin police chuan an sawi.
Venhim hna thawktute sawi danin Thawhtanni khan buaina a chhuak leh a, nawrh huaihawtte hnawh darh leh national highway dan chu sut tlang an tum a, mi pathum chuangin hliam an tuar a ni.
Manipur-a chi leh chi inkara buaina hi Meitei leh Kuki inkara intan a ni a, tunah hian hnam hrang hrang a kang kai tawh a. May, 2023 atanga buaina chhuak tanah hian mi 260 vel an thi tawh a, mi 60,000 vel himna zawngin hmun dangah an insawn chhuah phah bawk.