Titanic lawng pila chhiatna runthlak tak thleng karah khan, thihna chanchin lungchhiatthlak tak tak a inphum tel nual a. Chung zinga pakhat chu, sumdawng hausa Isidor Straus leh Rosalie Ida Straus te nupa chanchin kha a ni. Khatih laia dawr lian leh changkang, department store (shopping mall) Macy’s neitu zingah Isidor Straus kha a tel a. German-Jewish businessman a ni a, politician a ni bawk a, U.S. congressman a ni.
Sumdawng hausa leh politician lar, Titanic lawng chhungah pawh hriat hlawh pawl mi challang a lo ni bawk nen, khatia Titanic lawng a han pil dawn takah khan, duhsak an hlawh a, hmeichhia leh naupang karah chhanhimna lawnga chuang tur zingah an lo telh a. Mahse, Isidor Straus chuan ‘kei chu ni lo ve’ tiin midang a kian ta tlat a. Chu veleh, a nupui Rosalie Ida Straus chuan a pasal tel lova chhanhimna lawnga chuan chu duh bik lovin a pasal kut chu a chelh a, “Ka pasal nen hian eng mahin min then thei lovang. Hun kha leh chen kha hringnun kan lo hmang dun tawh a, thihna pawh hi kan hmang dun leh mai tur a ni,” a ti ve ta tlat.
Titanic lawng pil mek chhuatah chuan thlabar taka tlan kual ruai midang karah, Isidor Straus leh Rosalie Ida Straus te chu kut insuihin an ding dun a, chu chu chhanhimna lawnga chuangten an hmuh hnuhnun bera an awm dan a ni.
Titanic leh Runthlak
