Title hum tura kal zel Alcaraz

Indian Wells lama tournament kal mekah champion lai Carlos Alcaraz of Spain chuan Thawhlehni khan 6-3 6-3-a Hungarian Fabian Marozsan hnehin quarter-final a lut a, ATP Masters 1000 tournament-a match 50 a chak tlinna chiah a ni.
Spaniard hian minute 75 chhungin straight set hnehna a chang a, kum 2016 champion Novak Djokovic hnu lama Indian Wells title humhim leh thei hmasaber ni turin vawihnih chiah chak a mamawh tawh.
World number two Alcaraz-a tum leh tur hi he thu buatsaih lai hian a la chiang lo a, last 16 inkhel danga intum German sixth seed Alexander Zverev leh Australian 10th seed Alex de Minaur chak zawk zawk an ni ang.
Grand slam title pahnih hawn ve tawh Alcaraz hian nikum Italian Open-a staright set hmanga a hneh loh world number 58 Marozsan a hmachhawn dawn khan a ‘nervous’ tih sawi chungin a zam rilru hle tih chu a zep lo tih a puang a, “Awlsam taka min hneh tawhtu hmachhawn leh tur ka ni miau a, Rome khawpuiah khan hnehna chang turin chance ka nei lo hrim hrim a, chuvangin tuntuma kan insu leh tur pawh hi ka tan a awlsam lo.
“Vawiinah erawh Rome-a ka khelh dan aia thaa khelh dan ka hrechhuak tawh a ni,” a ti.
Kum 20 mi Alcaraz khan set khatnah tum hnih ngawt a tumpui kha a break a, set hnihna game ruknaah break lehin, kum thum chhung a zawn zatin Indian Wells-ah last eight a lut tling ta a ni.
Thawhlehni California lama last 16 inkhel dangah Greek 11th seed Stefanos Tsitsipas chu rin loh takin Jiri Lehecka lakah 6-2 6-4-in a tlawm thung!
Czech 32nd seed Lehecka khan kumin January thla mai khan Adelaide International final-ah Britain player Jack Draper hnehin a career-a a hmasaber ni turin ATP title a hlawhchhuak a, Indian Welss lamah pawh a la kal tluang ta zel rih a ni.
Quarter-final lama a tum tur hi a la chiang bik lo a, Italian third seed Jannik Sinner elawh American Ben Shelton inkhela chak zawk zawk nen semi-final luh an inchuh zui leh ang.
He tournament kal laiah hian Novak Djokovic erawh Nardi hneh loin a lo tlawm ringawt tawh a nih kha!
Women’s draw lamah 16th seed Elina Svitolina pawh 6-1 4-6 6-3-in American Emma Navarro lakah a chak lo a; Ukrainian player dang Marta Kostyuk erawh last eight lut zingah telin, Russian Anastasia Pavlyuchenkova lakah 6-4 6-1 hnehna a chang.
Kostyuk hian an ram run mektu Russia player dang Anastasia Potapova a tum leh dawn a, Potapova hian Italian 13th seed Jasmine Paolini lakah 7-5 0-6 6-3 hnehna a sualchhuak ve bawk.