Tlabunga chhungkaw pakhat chuan
nau an nei dawn a, hmunpui an pan a ngai; chawlhkar liam ta Inrinni khan Tlabung an chhuahsan a, Aizawl thleng turin a lo berah Rs 30000 an seng turah ngaih a ni.
Tlabung leh Lunglei inkar kawng a chhiat avangin kawng dang an zawn a ngai a, lawng-in Marpara an pan a ngai. Lawng hi maxi cab service te anga hun bi neia tlan a nih loh avangin mamawh chuan ‘hire’ a ngai a, Rs 10000 chuang man a ni. Marpara atang chuan Mamit district-a West Phaileng an lut ang a, chuta tang chuan Aizawl an pan ang. Lawng leh motor man bakah thlenna leh ei leh in mante nen, senso a sang duh hle.
Tlabung pawhtu kawngpui pawimawh, Lunglei leh Tlabung inkar kawng National Highway 302 a chhiat em avangin July vel atang khan Tlabung mipuiin kawng hrang hrangin an tuar a, ni tin mamawh thilte pawh a van bakah a to tih thu dawn a ni.
Tlabung atanga thu dawn danin, July thla laihawl vel atang khan maxi cab an tlan mumal tawh lo a, a mamawh zualin man to taka an ‘hire’ avanga tlan an awm zeuh zeuh chauh.
Ni tin mamawh phurte pawh an tlan lo a, Tlabunga zawrh tur hi Lunglei velah a tangkhang nasa. Kawng sira kalsan tawp te pawh a awm a, kawnga laka motor nena hnutchhiah tawp te pawh an awm.
Eirawngbawlna gas pawh July thla chawhnu lam atang khan a thleng mumal tawh lo a, chhungkaw engemaw zat chuan thing hmangin eirawng an bawl tawh.
Mipui pawhin loh theih loh thil a nih loh chuan zin an tum lo nia sawi a ni a, October ni 5-8 chhunga neih tur Khawthlangtuipui Presbytery pawh Tlabung kawng a chhiat em avang hian December thlaa neih turin an sawn ringawt.
Km 97 vela thui Lunglei leh Tlabung inkar kawngah hian loh theih loh thila zin chu an awm a, zan thum te an riak. ‘He kawng hi a tha tak tak ngai lo a, km 97 vel chauh ni mah se a hma pawh khan darkar ruk te kan thang. Tunah chuan zan thum te an riak,’ Tlabung pa pakhat chuan a ti.
Khaw dang nena an inkalpawh a ngai thin tho si a, loh theih loh thila Aizawl zin ngaite chuan lawngin Marpara an pan thin. Lunglei kal tur pawhin lawngin Chawngte an pan phawt a, Chawngte-ah riakin, chuta tang chuan motor-in Lawngtlai pan lehin, chuta tang chuan Lunglei an pan thin.
Tui tam lai a nih avangin lawngin an zin thei a, hei hi an vanneihna a nih rualin tui a tam avangin a khauh a, lawng-ah mi an chuang tam thei lo leh si.
“Ni tin mamawh thil a to hi mak kan ti lo a, lei tur a la awm hi mak kan ti zawk,” Tlabung pa pakhat chuan a ti.
Tlabung mipuiin kawng chhia tuar nasa
