Lunglei District Agricultural Marketing Committee (DAMC) huaihawtin Zirtawpni khan Tlabung RD Block huamchhunga society hrang hrang tan sawrkar flagship programme – Bana Kaih ruahmanna hnuaia thlai thlan bik hralh dan tur kalphung inhrilhfiah a ni. Society 21 aiawh mi 56 telin, thlai thar zawrh leh hralh chungchanga society mawhphurhna zirho a ni.
Mizoram Agricultural Marketing Board (MAMB) co-opted member C Zochansangi chuan thlai thar chi li – sawhthing, aieng, hmarcha leh hmunphiah hralh kalpui dan tur a sawifiah a. Chawhnu lamah Lunglei district horticulture officer B Lalzarzova kaihhruaiin sawiho a ni a, zawhna awmte chhan a ni.
Bana Kaih inhrilhfiah hi block hrang hrangah hman tum a ni a. Lungsen leh Tlabung block-ah buatsaih a ni tawh a, kar leh lamah Lunglei leh Bunghmun block-ah buatsaih leh a ni ang.
Tlabung hi Lunglei district-a thlai thar hralh tur dahkhawmna – secondary collection centre (SCC) pali zinga pakhat atan sawrkarin a ruahman a. Zodin M-PACS Ltd Tlabung chu MAMB atangin sawhthing lei thei tura phalna (empanelled buyer certificate) pek an ni tawh a, kg khat Rs. 50 aia tlawm loin an lei dawn a ni.
Tlabungah Bana Kaih hrilhfiah
