An hnathawh atangin mipuiin an endik a, sawrkar leh tlaka an ngaih theih nan tlak huamin hna an thawk dawn tih chief minister Lalduhoma chuan a sawi.
Thawhtannia ZPM office-a inkhawmah party leader ni bawk Lalduhoma chuan ram mipuiin an enchhin a, enchhin zel turin an duh a. An hnathawh atangin mipuiin endik se, sawrkar leh tlaka an ngaih theih nan tlak huamin hna an thawk dawn a. Ni 100 chhunga an tih tur an puante khawng takin an kalpui dawn tih a sawi.
Inthlanah khan a beisei aia tlem ZPM an tling a, an tlin lohna tam tak chu sum leh pai vang a ni tih a sawi. “Sawrkar siamtu ni mah ila, sum leh pai hmangin vote kan zawng ve dawn lo. A bikin minority area lamah kan tling mumal loa, ram puma rual taka mipui kan kal tlan theih nan thianghlim takin hma kan la ang,” a ti. Chief minister-in works department a chang lo ang tia an lo sawi tawh angin works department a chang loa, bialtin a enkawlpui vek zawk dawn tih a sawi bawk.
Mipui, neutral-te avanga hnehna chang an ni tih Lalduhoma hian sawiin, “Neutral an tam poh leh ram a kal tha dawn a, party ruihchilhna hi kan kalsan tial tial a ngai. ZPM hian mipui beng kan tithlep tur a ni loa, keinin mipui kan tih beidawn chuan Zoram mipui hian beisei tur dang an nei tawh loang,” a ti.
Bial tinin minister neih duh vek mah se, minister bial nih chak chu thil awmdan an hriat tawk loh vang a ni tih a sawi a. Mipui sawrkarah chuan minister leh MLA an inthlau vak dawn loa, MLA-ten department an enkawl dawn loh avangin bial tan leh ram mipui tan theihtawpin an thawk thei zawk dawn tih sawiin “MLA taima tak bial nih a hlawk ber zawk dawn. Term hmasaah kan MLA ten tha takin hna an thawk a, an hlimthlaah tunah hian kan awm mek. Kalphung tharah chuan eng hna pawh a tha hle tur a ni. Mipuiin min thlir reng a, tibeidawngtu kan ni thiang lo. Kan hotute kaltlanga min hunna theuhah mipui beiseina tha theihtawpa kan chhan a ngai a. Ram rorelnaa Pathian ram a taka thleng turin kan inbuatsaih a ni,” chief minister hian a ti.
Tlak huamin hna kan thawk dawn – Chief minister
