Tlanchhia an awm, mahse an la ralmuang

Kar hmasa lam atangin Champhai district ep Myanmar lam atangin Zokhawthar-ah raltlan an lut thar leh a, mahse Myanmar lam hi an la ralmuang.
Zokhawthar ep Myanmar lam atangin tun hnaiah mi 1000 bawr an raltlan a, inkah a hnaia an hriat vangin an lo insaseng lawk a ni. Dam lo te, kum upa leh nunau tan lo tlanchhiat lawk a himah an ngai a, kar hmasa leh a hma chawlhkarah khan Zokhawthara lut thar hi ni tin an awm.
Champhai district ep, |iau chhak lam hi Hualngoram an ti a, Myanmar-a Chin state chhunga mi a ni. Myanmar sipai sorkar paihthlak tuma hmun hrang hranga mipuiin sipai an din khan Hualngoramah pawh CDF (Hualngoram) an che a, anni hi Hualngoram People’s Organisation (HPO) hnuaia mi, an sipaite an ni.
HPO hian 2023 November ni 13-ah sorkar sipai kut atangin Hualngoram hi an la a, vawiin thlengin an la enkawl. Sorkar sipaiin lak let tumin thapui a thawh dawn tih thawm a awm a, tun hnaiah mi 1000 vel an raltlan thar leh ta a ni.
“Tun hnaiah Khawpuichhip-ah sual sipai (Myanmar sorkar sipai an sawina) te’n jet fighter an hmang a, bomb an thlak a, mi pasarih an thi a. Falam an la let a, an target leh tur chu Hualngoram a ni ang tih rinna a awm a, chuvang chuan mipui an ralmuang lo a ni,” HPO vice president C Liankunga chuan a ti.
“Hualngoram hi lak let an duh em em a, trade centre hi a hma pawhin Myanmar sorkar sum hmuhna pawimawh a tling a. Chuvangin rawn inzarpharh an tum ang tih hi chu a hma atanga rin sa a ni,” tiin a chhunzawm a, “Mipui pawh theihtawp chhuahin kan thlamuan a, bomb an rawn thlak a nih pawha bihrukna tur khur laih vek tur kan ti a, warning inpek dan tur te pawh kan inhriattir a,” a ti.
“Theihtawp kan chhuah a, ram venhim tumin khawng leh khauh takin hma kan la mek. Sipai an duty a, ngawrh takin ram venhim hna kan thawk a. Tin, sual sipai an rawn kal a nih chuan kan unaute’n min pui dawn a, hmun hrang hrang atangin mipui sipai an rawn kal ang. Chutiang chu kan chet thin dan a ni,” a ti bawk.
HPO awp Hualngoram-ah hian khaw 58 a awm a, an awp hnua chhiarpui an neihin mi 30000 vel an cheng an ti. An khawpui chu Khawmawi a ni a, Khawmawi chu Zokhawthar bul chetah a awm, |iau luiin a daidang.
Myanmar sipai sorkar hi an tawlh nasa a, hmun hrang hrangah mipui sipaiin thuneihna an chang. Titi thenkhatah chuan Myanmar ram 80% vel chu mipui sipaite kutah a awm hman a, tun hnaiah an lak let leh nual avangin sipai sorkar thuhnuaia awm hi 30% chuang a ni tawh ang tih a ni. Hualngoram pawh lak let an tum hmasakah a telah ngaih a ni a, chuvanga ralti mi engemaw zat chu tun hnaiah Zokhawtharah an tlanchhia a ni.
HPO vice president C Liankunga chuan Hualngoram a ralmuang tih a sawi a, “Sual sipai an rawn kal a nih loh chuan kan ralmuang ang. Tunah rih chuan a ralmuang a, an (sual sipai) rawn inzarpharh dawn em tih erawh hriat a ni rih lo a. An tum a nih chuan rang takin kan hria ang a, mipui pawh kan hriattir ang,” a ti.