Aizawl chawmtu Tlawng lui a nu leh tawh a, April ni 28 khan mipuite hnena tui semtu PHE department-in tui an lak (pump) loh phah.
Tui nut/fim dan tehkhawng hi NTU (Nephelometric Turbidity unit) an ti a, Tlawng lui hi a pangngaiah chuan NTU 30 te a ni thin, NTU 100 a pel ngai lo tih thin a ni. Lui fim tak a ni a, mahse April ni 28 khan NTU 1500 chuang daih a ni.
Greater Aizawl Water Supply Scheme (GAWSS) Phase I, Phase II leh Phase II te a awm a, phase pathum hnuaiah hian Tlawng tui hi PHE department-in lain an sem thin. April ni 28 khan Phase pathumte hi an chawl vek tih thu dawn a ni.
Phase I leh Phase II teah hian Tlawng lui tui hi Reiek kaiah an pump a, April ni 28 zing lam dar 8 velah khan NTU 30 vel niin, fim tak a ni. Mahse a hnu lawk, dar 8.20 velah NTU 1508 a ni ta daih a, pump chi a ni lo.
PHE department atanga thu dawn danin, nilengin, tlai dar 5 vel thleng khan NTU 1500 aia hniamah a tla lo a, NTU 1500 vel a ni char char. A nut ber lai, chawhma lam dar 8.30 velah chuan NTU 1527 a ni.
Phase III lamah pawh a nu a, NTU 1700 te a kai. Phase III hi Setlak lamah an pump a ni.
PHE department lam sawi danin, NTU 500 chung lam hi tihfim a hautak a, NTU 1000 a kai phei chuan tih chi lohvah ngaih a ni. Tha leh bawlhlo a heh a ni mai lo a, mihring tan a lo him lo ang a, an chesual palh ang tih pawh a hlauhawm.
Ruahin hmun hrang hranga leivung kha luiah a len lut a, chu chu Tlawng lui nut chhan lian ber chu a ni, PHE department lam chuan an ti a, tun hnai ruah surin leivung paih a len lut a, a nu ta vak mai a ni tih chu an thlir dan a ni. Thawhlehni pawh khan ruah hi khai aia rei sur ta se, tui hi a nu lehzual ang, an ti.
Nikumah te, kum hmasaah te Tlawng lui hi a lo nu fo tawh a, pump chi loh khawpin a lo nu tawh thin. Kumin kum tirah ruah a tam lo a, tun hnaiah ruah a’n tam deuh a, a nu leh ta nia ngaih a ni.
Tlawng tui a nu leh tawh
