Aizawl khawpui tui lakna ber Tlawng lui nut chhan chu leivung paih dan a mumal loh vang a ni ber tih sawi a ni.
PHE department chuan tunah hian Greater Aizawl Water Supply Scheme Phase-I leh Phase-II ah duh angin tui an pump tam thei loa, tunhnai ruahsurah bawlhhlawh leh leivung paih, Tlawng lui leh a fintu luite atanga rawn lut nasa lutuk thlitfim a harsat vang a ni tih an sawi.
Department hotute sawi danin, Phase-I lakna tui a nut deuh pawhin, tui pump tam thei zawk Phase-II lam hi a fintu luite a nu nasa lutuk ngai loa, tui nu avanga harsatna liantham tak an tawk meuh lo tih an sawi. Chutih laiin tunhnaia ruah bawhawk surah Phase-II lam lakna hi a nu a, thlitfim harsa khawp a ni chho ve ta tih an sawi a ni.
Tui thlitfim tlak hun tlaivara nghakin PHE department thawktute an hah hle a, harsa lutuk loa Aizawl khawpui tan tui sem zai theih dan an ngaihtuah mek zel tih an sawi.
GAWSS Phase-II tui lakna a nut ve tak thut chhan hi la chhui zui vek ni lo mah se, Hualngohmun to Samtlang leh Muallungthu to Lungphun bypass road kawng laih leivung paih dan mumal loh vang nia hriat a ni tih thu dawn a ni a. Thuneituten enfiah rang se, dan bawhchhiatna a awm chuan a tul anga hma lak a tul hle tih an sawi a ni.
PHE hotute chuan Aizawlah micheng an tam belh zel avangin tui connection pek hian mipui mamawh a phuhru zo lo tial tial tih an sawi a. Dan ang chuan connection pakhat hi inhman tawm phal loh ni mah se, chhungkaw tam takin an inhman tawm tih an sawi.
Tlawng tui pump theih loh chhan leivung paih dan mumal loh vang
