Aizawl khawpui tui tlan Tlawng luiah vawk pul hri paih a nih avangin khawthalo hri laka himna atan Aizawl mipui tan bawrhsap hmalakna in a thlawna typhoid danna pek an phut tih Center for Economic and Social Justice chuan an sawi.
Tlawmngai pawl – Center for Economic and Social Justice (CESJ) hian vawk pul hri – African Swine Fever (ASF) vanga vawk thi sawngbawl chungchangah Mizoram district tin bawrhsap hnenah ngenna lehkha an thehlut a. Mizoram pumah vawk pul hri leng mekin, vawk tam tak an thi tawh a; mi thenkhat tan chuan vawk vulh chu an eizawnna a nih rualin, vawk thi kan sawngbawl dan kawngah mumal zawka kalpui kan mamawh tih hria in, ruahmanna an thlen tih a sawi.
Aizawl bawrhsap bik hnena an thu thlenah – Tlawng luia vawk thi ruang paih a nih vangin Aizawl khawpuia cheng, PHED-in Tlawng lui tui an lak ring zawng zawng typhoid hridanna a thlawna pek nise, an ti.
Mi thenkhatin an vawk vulh thi dai hnaiah leh kawr leh luiah paihin, a bikin Aizawla vawk vulh, an vawk thi phumna tur ram neiloten an paih mai zel nia a lan thu an sawi a. Heng hian kan tui tlanah harsatna leh kan hriselna kawngah nghawng tha lo a neih theih dawn avangin ruahmanna tha zawk nen kalpui a nih theih nan hma laksak theuh turin bawrhsap tin an beisei tih CESJ hian a sawi a ni.
CESJ ngenna dang:
8 Khua leh veng tina vawk vulhte VC/LC hriatpuinain registration kimchang taka tih vek nise, hetah hian mahni huan leh farm-a vulhte pawh a bialtu LC/VC-ah zel registration tih nise, registration ti lote chuan khawiah mah an vawk note leh a sa an hralh chhuah theih lohna turin certification system hman nise.
8 VC/LC hriatpui loha vawk thi phum leh tih ral phal loh nise, thenkhat tan vawk vulh chu eizawnna tak tak a nih rualin, an eizawnna hnar a chah hnu pawha dan anga an vawk thi phum thlap thlap thei lo an awmin, a harsa zualte tan tal phumsak dan sawrkarin ruahman se.
8 Vawk hri len lai chuan record leh a tak a inmil leh inmil loh hi a lo berah kar khat danah tal verification ti turin sawrkar lamin inspection nei thei se.