Meghalaya oppposition TMC te chuan Assembly inthlanah chakna an chang a nih chuan Assam leh Meghalaya-in border pact an siam chu an hnawl nghal tur thu sawiin ramri buai chinfel nan tha zawka inrawnkhawmna neih leh tur a nih tur thu a sawi.
Assembly member 60 awmna Meghalaya Assembly inthlan hi February 27 ah neih tur niin March 2 ah vote chhiar a ni ang. Assam leh Meghalaya te hian March 2022 khan kum sawmnga chuang ramri buaina an neih hmun 12 zinga paruk-ah inremna an ziak a ni.
“|ul hauh lova Assam laka inpek tihtawpa border village a chengte himna ngaihtuahin Assam sorkar nena Border MoU ziah tawh chu hnawl a ni ang a, ramri buaina chinfel a nih theih nan tha zawka chinfel a nih theih nan hmalakna thar neih a ni ang,” tiin TMC manifesto chuan a tarlang a, he manifesto hi party national general secretary Abhishek Banerjee an a tlangzarh a ni.
“Boder village a chengte security pawh nasa zawka tih that tur niin police check-gate te hmun pawimawhah dah a ni ang a, hei hi Mukroh a thil thleng ang pawisawi lo tena vanduaithlak taka nunna an chan ang a thlen tawh loh nana ruahmanna tur a ni,” tiin manifesto chuan a tarlang bawk.
State pahnih tena border agreement an neih hi Union Home Minister Amit Shah awmpuina hnuaiah Chief Ministers of Assam leh Meghalaya Himanta Biswa Sarma leh Conrad Sangma te chuan an ziak a. Ramri 884.9 km a seia ram inchuh hmun 12 zinga parukah inremna ziah a ni.
TMC te chuan ‘poverty-free’ Meghalaya tiam bawkin kum nga chhungin State economy chu double-digit in a thang ang an ti bawk a. TMC te hian Meghalaya-ah hian kum 2021 khan Congress MLA 17 atanga 12 laiin an zawm avangin an lian nghal hle a ni.
“Services leh tourism sector ngaih pawimawh bik a ni ang a, hengah te hian private investment tam zawk kalpui a nih theih nan hmalak a ni ang,” tiin manifesto chuan a tarlang bawk.
TMC te chuan economic plan- Vision Meghalaya 2033 India kum nga chhunga ease-of-doing business ranking-a top 10 zingah tel hman an tum bawk a. Coal mining pawh scientific zawka kalpui an intiam bawk.
Heng bakah hian TMC te chuan zirna sang zawk zir zel tur zirlaite hnenah laptop 1 lakh pek an tum bawk a, hmeichhia leh thalai hna nei lo te hnenah thla tin Rs 1,000 pek an tiam bawk.
An flagship scheme te chu an sorkar atanga ni 100 chhunga kalpui hman vek an intiam bawk a. Eirukna lamah ‘zero tolerance’ an kalpui tur thu sawi bawkin vigilance committee dinin social audits te kalpui a ni ang an ti bawk.
“Meghalaya-a Inner line Permit (ILP) hman a nih theih nan expert committee din a ni ang,” tiin manifesto chuan a tarlang bawk a.
“Meghalaya Trinamool Congress te chuan State rorelna chu pawn lam mite kuta a luh a remti dawn lo. Sorkar chu mipui te siam, mipui ta, mipui tana thawk a ni ang a, New Delhi emaw Guwahati a thu te ni lovin Meghalaya a rinawmna thutiam la a ni ang,” tiin manifesto an tlangzarh tak chuan a tarlang bawk.