Tualte vanglai han tih hian Mizo tan chuan a chiang mai a, an vanglai kha titi ngaihnawm a tling. Tualte khua hian tunlaiin tomato lamah vanglai an tawng mek.
Tomato-ah Mizoram a intodelh tawhah ngaih a ni a, khaw hrang hrangin tomato hi an thar. Tualte hi a thawh hlawk pawl an ni ngei ang.
Tualte khua hian nikum khan tomato hi quintal 14100 vel an thar a, an hlawkpui hle. Chhungkaw engemaw zatin ei berah an neih mek.
Chhungkaw 200 velin tomato hmun hi an nei a, ram huana tomato an chin bakah mahni in bul huanah tomato hi an thar bawk. In bul huanah ringawt pawh hian chhungkaw thenkhat chuan hralh fe tham an nei. Society an din a, society hian a hralh lam hi an buaipui.
A man (rate) hi thlai dang ang bawkin a che nasa a, nikum khan kg 1 man Rs 140 a nih lai kha a to ber lai a nih thu an sawi. A tlawm lai chuan a tla nasa a, Kg-a Rs 10 lek a nih lai te pawh a awm an ti.
An chhinchhiah danin, 2024-a thar hnem ber chuan quintal 170 vel a thar a, cheng nuai 9 vel a lei.
Tomato hi kum khatah vawi thum an ching a, ni 80 velah an lo tan thin. Kum khatah vawi thum an lo tihna a ni a, ‘off season’-ah pawh tomato hi a rah. Mahse fur lai chuan tomato hi a chhe hma an ti.
Tomato hi Mizoramin a thar hnem ve tawh a, horticulture department lam chuan 2019 vel atang khan Mizoram hi a intodelh tawhah an ngai. A tirah chuan tomato green house-ah an ching a, tunah chuan ramhnuaiah an ching nasa tawh.
Tomato thartu Tualte
