Top 10 player hneh zawn thei Tauson

Canadian Open khelh mekah Thawhlehni zan khan Danish player Clara Tauson chuan 6-1 6-4-a Grand Slam champion Madison Keys sawp chungin semi-final a lut a, he mi hma chiah round-a second seed Iga Swiatek pawh lo barakhaih tawh a nih avangin seeded 16th hian Montreal khawpuiah a zawnin world top 10 player pahnih a paltlang ta a, a sulhnu enin title beisei ngam tur a ni tawh!
Sixth seed Keys a paltlang leh hnuah Tauson hian a career-ah WTA 1000 semi-final tum hnih a lut tling ta a; last four a luh rualin kum 22 mi hian an chhungkaw harsatna tawh mek sawichhuakin, “Ni hnih liamta mai khan vanduaithlaktakin, ka puin min boralsan a, chuvangin, he match hi ka pu tan lak ngei ka duh a; Swiatek ka hneh tuk, nimin mai khan ka pu thih thu hi min hrilh a, ka pu tan khelmual luh thuai thuai ka duh a, a tan a tha thei ang bera khelh ka duh a ni. Min lo thlir ve ngei ka beisei,” tiin a pu thihnain court chhungah tumruhna sang zawk a pek thu a sawi.
World number 19-na ni mek Tauson hian Australian Open champion Keys lakah harsatna lian a tawk lo a, vawiina final luh inchuh match-ah WTA world ranking-a 49-na luah mek Naomi Osaka a hmachhawn ang.
Nizan women’s singles semi-final hmasa zawkah Victoria Mboko (Canada) leh Elena Rybakina (Kazakhstan) an inhmachhawn a, result tarlan hman a ni lo.
Four-time Grand Slam champion Osaka hian quarter-final dangah 6-2 6-2-in Ukrainian Elina Svitolina a sawp ve bawk a; Japanese star tan a career-a Canadian open last four a luh vawi khatna niin, kum 2022 hnu lama WTA 1000 semi-final a thlen vawi khatna a ni nghal bawk.
Infiamna phenah hian pawisa thaptu an lo awm ve zel a, chuti ang mite zingah an rin ang result hmuh loh vanga vauna chhakchhuak ta mai hriat tur an awm thin a, Ukrainian chak ringtu nia ngaih pakhat pawhin 10th-seeded Svitolina hi thahah a rawn vau!
He mi chungchang hi kum 30 mi Elina Svitolina chuan Instagram story kaltlanga sawi chhuakin, “Bettor zawng zawngte hnena ka chah duh che u chu hei hi a ni: Infiammi ka nih hma hian nu ka ni.
“Hmeichhia – nute hnena tawngkam in cheh dan hi a zahpuiawm hle mai. I nuin i message thawnchhuah hi a hmuh chuan a lawm lo ve khawp ang,” tiin.
Toronto lama Canadian Open men’s tournament lamah American second seed Taylor Fritz pawhin semi lut turin Russian sixth seed Andrey Rublev lakah 6-3 7-6 (4) hnehna a chang a, a chipui leh fourth seed ni bawk Ben Shelton nen final luh an inchuh ang.
Wimbledon semi-finalist Fritz hian Australian ninth seed Alex de Minaur laka 6-3 6-4 hnehna changin a career-a Masters 1000 semi-final a luh vawi khatna a nghak chhuak.
Vawiin hian Centre Court-ah Canadian Open men’s singles semi-final match hnih khelh a ni dawn a, seed ranking 1 Alexander Zverev (Germany) leh seed ranking 11 Karen Khachanov (Russian athlete) intumin, last four match pakhat zawkah seed ranking 4 Ben Shelton (United States) leh seed ranking 2 Taylor Fritz (United States) an hmachhawn ang.