November 11, Inrinni zan khan English Premier League khelh chhunzawm a ni a, tlawm nei lova kal tluang rei ber Tottenham Hotspurs chu Wolves lakah uiawm takin an tlawm. Tottenham hi Thawhtan zan khan Chelsea hneh lovin an lo tlawm tawh a, inrinni zanah an tlawm leh bawk nen kar khat chhungin tum hnih ngawt an tlawm. Tottenham an tlawm lai hian Arsenal erawh chuan an mualah hnehna an chang ve thung.
Manager thar Ange Postecoglou hnuaia bul tan tha tak Tottenham hi Molineux Stadium-ah Lenglutin Wolves an hmachhawn a, Mimualah bul tan tha viau mah se hun tawp dawn hnaiha goal hnih an chhuah vangin uiawm takin an chak lo. Tottenham tan hian inkhel tan atanga minute thumna lekah Brennan Johnson chuan hmahruaina goal a thun nghal. Chelsea lakah pahniha tlem zawk an nih vanga an tlawm hnuin bul an tan tha a, point thum hmuh ngei an tum hle.
Hma takah goal thun mah se Spurs hian goal dang an thun belh thei lova, an hun tha an chhawr tangkai loh an tuar. Hun pangngai tawp thlenga hnufual zawk Wolves in a tawp an khar tha a, hun pek belhah goal hnih an thun ta hial. Minute 90+1-ah Pablo Sarabia chuan Matheus Cunha siamsak atanga goal thunin an si phurh a sut. Sarabia goal thun hian mualneitu a fuih phur viau a, an mualah hnehna chan ngei tumin tan an khawh zui chiam a, hun tawp dawn hnaihah an vannei.
Hun pek belh tawp dawn hnaih minute 90+7-ah an an si phurh sutna goal thuntu Pablo Sarabia siamsak atangin Mario Lemina chuan hma an hruai letna goal a thun. Hmahruaina goal an thun hnuin Wolves in hun an pawt khawtlai thiam viau a, an tum ti hlawhtlingin, inlehthalna lian an thlentir a, an mualah ngei point thum hlu tak an hmu.
Wolves lakah ui-awm taka an chak zawh loh vangin Tottenham hian khelh 12 atangin point 26 an hmu a, pathumnaah an tla hniam. An chungah hian he thu buat-saih lai thlenga point 27 ve ve hmu mek Aesenal leh Manchester City te an awm mek. An muala chak Wol-ves hian khelh 12 atanga point 15 hmuin 11-naah an awm chho ve thung
Pahnihnaah Arsenal
Wolves lakah Tottenham an chak lo tih an hriat hnuin Arsenal chu an mualah Burnley hmachhawnin an inlan a, Gunners hian 3-1 a hnehna changin an hmelma lian Tottenham an lehpel a, pahnihnaah an inhlangkai.
Arsenal hian an mualah khel tha viau mah se goal an thun har hle. Ball chang tamin, goal thun theihna hun tha nei bawk thin mah se an tlarhma player pahnih Gabriel Jesus leh Eddie Nketiah te inhliam an tuar a, a tawp an khar tha hleithei lo. Hun rei tak chhung goal an thun theih loh hnuin chawlhlawk dawn hnaih minute 45+1-ah Leandro Trossard chuan Bakuyo Saka siamsak atangin hmahruaina goal a thun a. Trossard goal thun hmang hian si khat faia hmahruai chungin chawlhlawk an hmang.
Chawlhlawk hnu lamah Brunley in goal an thun hmasa ve thung a, minute 54-na lekah Josh Brownhill chuan goal thunin an si phurh a sut. 1-1 a nih hnuin Arsenal an khel tha leh zual a, na takin an mikhualte an nawr zui nghal. Goal an chhuah atanga minute thum hnu lawkah defender William Saliba chuan goal hmahruai thuntu Trossard siamsak atangin hma an hruai nawn lehna goal a thun. Hma an hruai nawn hnuin an khel tha zui viau a, minute 74-naah Oleksandr Zinchenko chuan an goal thumna a thun a, an hmahruaina a tizau. 3-1 a hma an hruai hnu hian minute 83-naah an mifielder Fabio Vieira hnawhchhuah a ni a. Tam zawk ni mah se Burnley in goal an thun belh thei tawh chuang lo thung a, Arsenal in point thum an hmu ta a ni.
An mualah an chak leh tak vangin Arsenal hian champion tumin hma lam an pan zel a, khelh 12 atanga point 27 hmuin pahnihnaah an awm mek. An chungchiaha awm Manchester City chuan nizan khan Chelsea an hmachhawn a, an chak a nih chuan Gunners nan an inkar a zau belh ang.
Tottenham an chak lo leh tawh
