Tun tum Anthurium Festival chu state pawn atanga lokal tourist hmel kan hmuh tam ve ber tum a ni hial awm e. Tourist tam zawkte hi chu Anthurium Festival chhim tur hrim hrima state pawn atanga lo kal vang vang ni lo mah se, tourist chambâng festival chhim thei hmuh tur hetiang zat an awm ta hi a lawmawm hrim hrim a. Tin, Anthurium festival huaihawttu lam pawh an inbuatsaihna a tha a, tourism minister pawhin a phurpui thiam bawk a, tum dang ai chuan hma kan sawn leh deuh a tih theih. Festival tawp nia tourism minister-in tourist-te lawmna thu leh duhsakna a han hlan laia tourist-te hlim hmel kha a hmuhnawm hle a ni!
Tunhmaa assembly house chhunga ram hruaituten, ‘tourism hi state economy chawikang thei tura thawh hlawk ber industry a ni thei’ an lo tih thin kha, tunah chuan a thleng dik chho dawn mek niin a lang a. Khatih laia ram hruaituten tourism potential an lo hmuh dan kha a dik em em rualin, a taka hma han lak zui chiam dan tur erawh an bangbo tlang a. Mizoram budget estimate-ah khan department budget zinga a mawngphah (top bottom 10) zingah tourism department hi a awm ngar ngar a. Thawktute hlawh leh department enkawlna tur kha budget estimate-ah a awm ve hram hram a ni ber. Chutih rualin, sawrkar laipui atanga tourism promote-na tur haichhuah tur tam tak a awm chungin, tourist lodge sakna tur bak kha tourism promote-na tur sum haichhuah dan an thiam lo nge, an tum lo nge, an peih lo tih a hriat loh a. State dangin central sum ringa tourism lama ‘international level’ an han hawlh thuak thuak tawh laiin, keini chu kan la hawi kual vel mai mai a nih kha.
Tunah chuan social media zar leh inkalpawhna rang leh awlsam zawk lo awm ta zar zovin, tourism thlipui a rawn tleh tan mek a tih theih a. Tunhmaa tourist lo dawnsawn tur nei ngah lo na na na chu, hetia tourist an rawn pun phut takah chuan, mikhual thlenna tur lamah kan buai chho chu a ni deuh der tawh mai. Hei hi a lawmawm lamah ngai ila, chutih rualin, mikhual thlenna lam hi sawrkar level atang pawhin tun aia nasa zawka ngaihtuah a pawimawh tih a lang a ni.
India rama tourism record lama hriat hlawh tak Shimla khawpui hi Aizawl khawpui ang bawka tlangram khawpui, Aizawl aia mihring tlemna leh a khawthleng pawh zim zawk a ni a, mahse tourism lamah chuan Aizawlin a khan lo nasa hle. Shimla hi chu British India Summer Capital hial lo ni tawh a ni a, Aizawl nena han khaikhin rual a ni lo. Tourism lama an tun dinhmun thleng tura bul an lo tanna hi a rei tawh tih a hriat.
India rama online travel company lian ber MakeMyTrip (MMT)-in a tarlan dan chuan, Shimla khawpuiah hian mikhual thlen theihna hotel leh lodging hi 482 a awm a, chung zinga 23 chu 5-star a ni a, 4-Star hotel 80 bakah, 3-Star leh a hnuai lam (unrated + homestays/villas/hostels) 379 a awm bawk. Tuna hriat theih chinah chuan, 2024 kum khan Shimla hian tlawhtu tourist nuai 25 a nei a, chawhrualin ni tin mikhual 6900 chuang a nei tihna a ni.
Tun hnaia sawrkar thuchhuahin a tarlan danin, kumin Jan-Aug chhung hian Mizoramah (Aizawl chauh ni lovin) khualzin 6,74,911 an awm tawh a; chawhrualin Mizoramin ni tin mikhual 2,812 nei ang kan ni. Hetih lai hian, mikhual thlenna tur hi kan la nei chaurau hle a, Aizawlah hian hotel leh lodging/homestay etc. belhkhawmin 60 vel awm ang a ni a. Star hotel dik tak hi Mizoram hian kan la nei lo niin a lang a, tunah hian Tourist Lodge Chaltlang hi 4-Star hotel-a cheibawl turin Hotel Polo Towers Ltd. Shillong nen thuthlung kan nei ve leih leih chauh a ni.
Hetiang kan han tarlan deuh duah chhan hi chu, Mizoram hian mikhual thlen in kan nei tha lo a, hetiangah hian kan mihausaho hian ram leh hnam tan an hausaknate hi invest uar ve ta se, kan ram tan hian a va han tha dawn em tih auchhuahpui ve kan duh vang a ni ber e.
Tourism industry
