Assembly Session kal mek nimina minister pahnih Demands zingah tourism department a tel a. Tourism industry hi tunhma atang tawh khan state economy chawikang thei tur department a nih thu ram hruaituten an lo sawi tawh thin. A pawimawhna sawi nasat a nih ang huin budget allocation lamah ve thung chuan ngaih pawimawh a hlawhzui ngai meuh lo a tih theih awm e.
Report hmuh theih chinah tourism budget hmasa ber kha kum 1987-88 khan a lo lang a, cheng nuai 38.85 niin department 44 zingah a mawngphah panga zingah a tel. Tun thleng hian a mawngphah lama dah a la ni zui zel bawk.
Tun tumah hian tourism tan cheng nuai 1193.64 (Vbch 11.93) dah a ni ta a, a tira budget nen khaikhin chuan thang ve tawh tak chu a ni. Chutih rualin, budget thanna hi tourism industry chawikanna tur lam aimahin thawktute chawikanna leh amah leh amah inenkawlna a ni deuh zel a, tourism promote-na atana sum serh hran a awm ngai lo tluk a ni.
Hun a lo kal zel a, kum 2002-03 khan tourism budget chu cheng nuai 512.50 a lo ni ve ta a; mahse, a hnu kum 10 chhungin budget hi a pung chak lo hle a, 2012-13 khan cheng nuai 568.11 niin, kum 10 chhunga a punna hi cheng nuai 55.61 chauh a ni.
A hnu kum 10 a lo ral leh a, kum 2022-23 khan tourism budget chu cheng nuai 1137.45 a lo ni ve ta a, kum 10 chhungin a let thawkin a lo pung ve ta. Mahse kum 2023-24 ah a tlahniam (Nuai 1134.16) leh thut a, 2024-25-ah a pung (Nuai 1392.80) leh hluai a; 2025-26 ah a tlahniam (Nuai 1166.44) leh thut a, tunah hian tourism budget chu cheng nuai 1193.64 niin, a tawn san ber tum a ni; mahse a sanna hi 0.8lakhs chauh a ni thung. A budget size hi lo lian ve ta deuh mah se, thawktu hlawh atana ral deuh vek tur a la ni tho tho.
Heta tanga lo lang ta chu, tourism budget hian tourism promote-na lam a hawi lo a, thawktute hlawh leh department inenkawlna ngawr ngawr a ni deuh zel a. Chutih laiin, central scheme tha tak tak kan hmuhte lah hi, “Khaw’nge, state-in sum kan neih loh hi, hengte tal hi a tangkai thei ang berin i lo chhawr teh ang u” tih ahnekin, sum chingpen, hluihlawn, thawh zawh theih loh, etc. etc tih thawm hi mipui bengah a lut tam em em mai a ni.
Tunah hian kan thawh hah man pawh ni lem lo, central sawrkarin communication leh transportation lama hma a lakna zar zovin tourist ten min rawn chim ta phut mai a. Hengte pawh hi kan la hmachhawn tur a ni tih kan hriatna rei tawh mah se, lo inhmakhua nachang kan hriat loh avangin a tlachawp bawkin kan lo dawngsawng a, kan buai rum rum zel a nih hi.
Tourism hmasawnna tura hmalakna thar a lo awm chho ta mek a, heta pawimawh hmasa ber chu infrastructure lam ai mahin, kan neihsa (natural beauties) te hi khualzinte hian engtin nge nuam taka an chen (enjoy) theih ang tih hi a ni. Khualchhawn dan kan inzirtir a ngai a, ei leh in lama thianghlimna leh environment vawn fai etc. Chu chu sum ngai lova kan thawhchhuah theih a ni a, budget dah tam thei lo mah ila, tha leh zung kan thawh theih lam hi remhre taka kan hman tangkai thiam a pawimawh a ni.
Tourism leh Budget
