Aizawl Traffic Police chuan dan bawhchhiatna hrang hrang avanga lirthei chetsualna thleng thin ti tlem tur leh mipui him zawkna atan July 19 – Pathianni chawhnu khan Aizawl khawpui hmun hrang hrangah ‘special drive’ a nei leh a, dan bawhchhiatna hrang hranga inhnamhnawih mi 220 an man.
Helmet khum loa ke hnih nei lirthei khalh chu dan bawhchhia zinga tam ber a ni a, 131 a ni. Driving license nei loa lirthei khalh 27, dan phal baka bike ri ring 10, kumtlinglo lirthei khalh 6, rui chunga lirthei khalh 4, two wheeler-a mi pahnih aia tam inphur 19, MV Act dang bawhchhia 23 an ni.
‘Lirthei khalhtute zingah inthlahdah avang leh midang tana harsatna thlen hreh miah lo, dan bawhchhia man tur kan la awm zel hi a pawi hle a, lirthei neitu/ khalhtute tan la thar zel turin kan inchah thar a ni,’ Aizawl Traffic Police chuan an ti.
Aizawl khawpui a lo him a, thlamuang taka kawngpuia mitin kan hman tlan theihnan special drive hi a tul anga kalpui zel an tum tih an sawi a ni.
Traffic dan bawhchhia 220 man
