State dangte nena khaikhin pawhin Aizawl Traffic Police leh Cyber Crime Police-ten hna an thawk tha hle tih Home minister Lalchamliana chuan a sawi.
Zirtawpnia 2nd IR Batallion hmunpui Khawzawl Lungvar Veng ami a tlawh tumin, thawktu indaihloh chung pawha Mizoram Police-in tha taka hna an thawk thin chu fakawm a tih thu Home minister hian a sawi a. A bikin Aizawl Traffic Police leh Cyber Crime Police-te chu state dangte khaikhin pawhin hna an thawk tha takzet tih a sawi a ni.
Police indaihlohna hnawhkhah tumin sawrkarin theihtawp a chhuah a, hrilengin harsatna a thlen avangin duhthusamin post ruak hnawhkhah theih ni lo mah se, compassionate appointment atanga lak mi 290-in training an nei mek tih a sawi a. Buarpuia tawhsual tawk havildar pahnih chhungte pawh hna pek an ni dawn tih a sawi.
2nd IR Bn commandant Saidingliana sawi danin, Mizoram Police hnuaia armed batallion 5-na ni turin 2001 January 15 khan 2nd IR Bn hi din a ni a. Tuna an awmna Khawzawl Lungvar Vengah hian 2005 April 5 atangin an awm tan. Tunah hian mi 465 vel an awm mek. 2nd IR hian hmun 15 – Khawlian BOP, Suangpuilawn BOP, Vanbawng BOP, NE Khawdungsei BOP, Champhai PS, Khawzawl PS, Saitual PS, Zokhaw-thar PS, Dungtlang PS, Ngopa PS, SBI Champhai, District Court Champhai, Khawzawl Link Office bakah Tuivai leh Mimbung Temporary Post-ah te venhim hna an thawk mek a ni.
Traffic Police leh Cyber Crime Police thawk tha – Home minister
