Tunhnaia Special Court ND&PS Act Aizawl District Court rawka cheng nuai 24 chuang lachhuaktu chuan youtube-a ‘Treasure Hunt’ a en atangin hetianga chet lak dan tur hi a duang niin a insawi.
The Aizawl Post-a tarlan tawh angin, Special Court ND&PS Act Aizawl District Court hi rawk a ni a. FIR-a cashier tarlan danin, kumin May 31 atanga June 3 inkar khan an sumfai dahna ‘chest/safe’ hi khawih a ni tih an hria a; sumfai nuai 50 chuang awmah nuai 24.87 vel lak bo a ni.
Aizawl Police Station-ah FIR hi thehluh niin, police-te hian an chhui nghal a, rinhlelh pakhat thlurbing an nei. He court-a thawk, a pa aia kal Lalrinnngheta (30), Tuikual ‘C’ chu sum bo thu hriat a nih hma lawk atang hian a chin hriat a ni loa, an inah pawh a haw lo. Chhuizui zel niin July 24 khan Lunglei Police-in an lo man a ni.
Police hmaa Lalrinngheta sawi danin, a pa aia office a kal lai hian he ngaihtuahna hi a nei tan a. Youtube-a ‘treasure hunt’ lam a en atangin safe tih chhiat dan tur hi ‘idea’ a nei a ni. June 1 (Inrinni) chhun khan office-ah hian kalin, safe hi hackshaw blade-in a kawpza a zaichhia a, a hawnna lam hi chem hmanga karin a kar hawng ta a ni. A bag kensaa leng tawk, nuai 25 tling te hi a la a, a bak chu a kalsan ta mai niin a sawi.
Office a rawk hnu pawh hian ni reilote chu office hi a la kal zui a, a kal a ngai tawh lo nia an hotuten an sawi hnu ah kal lo zui nghalin, inah pawh haw loin a thil ruk hi a chen zui a ni. Mizoram Rural Bank Khatla Branch ah account hawngin Rs. 16,52,648 a dahlut a; a bak hian scooter (nuai 2.5 sengin midang hmingin a lei a, an lei sak manah hian nuai 1 an hlawh) bakah thuamhnaw chi hrang hrang engemawzat a lei a; heroin ti thin niin, a hmeichhe kawp pakhat nen heroin lei nan hian an hmang nasat bakah Aizawlah leh Lungleia a phei hnu hian hotel velah a thleng tam hle bawk nia sawi a ni.
Police-ten an man hian MRB-a a account ah hian Rs. 7,63,410 a lo la awm a; a kut atang hian sumfai Rs.6000 hmu in, a thawmhnaw lei leh scooter pawh hi laklet sak vek a ni.
Thudawn danin Aizawl District Court-ah hian cctv a awm lo.
‘Treasure hunt’ zulzuiin Court rawk dan duang
