Treasury Bazar din thar leh tum lo
March 17 zinga kangchhia Treasury Square Bazar chu din thar leh tumna a awm rih lo niin Aizawl Municipal Corporation hotute chuan an sawi.
Thawhtanni zing dar 3.00 vela kangmeiin a tihchhiat Treasury Square Bazar-ah hian hriat theih chinah chawhmeh leh thildang zawrhna dawrte/thutna 60 chuang hret a kangchhia a ni.
Thudawn danin helai hmun AMC chuan hmun danga sawn turin ruahmanna a lo siam tawh a, an insawnna tur pawh dinfel tawh niin, ruahman ang hian luah zui a ni lem lo tih sawi a ni.
Kangmeiin a tihchhiat dan a hmuna tlawhtu Aizawl mayor Lalrinenga Sailo chuan Aizawl Treasury Bazar chu mipui him zawkna atan leh hmun pawimawh Assembly House awmna bulhnai a nih avangin hmun him zawka sawn a ni dawn tih amah zawttu thuthar thehdarhtute a hrilh.
Treasury Bazar-ah hian chhiatna hrang hrang alo thleng tawh thin a, a bula chengte tan tun dinhmunah a him tawkloh avangin helaia bazar insawnna tur Tuikual Venga AMC Complex-ah ruahman a ni tih a sawi a. Treasury Bazar chu a him zawkna atan tun dinhmunah mipui tana tlawh pawh theih loh turin ruahmanna an siam tih a sawi bawk.
Hetihlai hian Aizawl Treasury Bazar Association hruaitute chuan AMC-in an awmna hmun sawn a tumnaah ei hmuh zawh an inring loa, an thuthmun Treasury Square ami chu sawn lo turin sawrkar an ngen dawn tih a sawi.
Helai hmun hi Venghlui Local Council leh Tuikual South Local Council-in ram an inthenna lai a ni a. Thawhtanni vek khan heng veng local council pahnih hi thukhawmin thuchhuah intawm an siam a. Treasury Bazar kangmei a chhuah avanga a tuartu nitin eichawp zawngte an tawrhpuiin pawi an tih hle rualin, bazar hi tha zawka chinfel thuai a nih theihnan kangmeiin a tihchhiat sawrkar department-te bungrua senghawi leh siamthat hna thawh bak chu tumahin kut lo thlak rih lo turin an ngenin an hriattir tih an sawi a. Hma lak zel dan tur chu a tul anga inhriattir leh a ni dawn tih an sawi a ni.
Treasury Bazar din thar leh tum lo
