President Donald Trump-a’n lawng sipai chakna nena an ram beih tuma a vau hnuah Iran chuan US-in Iranian lawng chawlhhmunte a khar chuan khawvel eibar dinhmun chauh a tichhe dawn niin a sawi.
“Khawvel eibar laka dan lova ‘indo thlanna’ hmanga ‘phuba lak duhthlanna’ hian hnehna a chang thei ang em?!” tiin Iranian foreign affairs ministry thupuangtu, Esmaeil Baghaei-a chuan Thawhtanni khan X-ah a tar lang a. “Hmaia hnar pakhat tansak hi a hlawk ngai em?!” a ti bawk.
Trump-a chuan Iranian sipai lawngte chu ‘blockade zone’ hnaih lo turin a ti.
“Iran-a Navy hi tuipui hnuaiah an awm a, an boral vek tawh – lawng 158 an ni. Kan la kah loh chu an tlem te, ‘fast attack ships’ an tihte an ni a, hlauhawmah kan ngai lo,” tiin Trump-a chuan social media-ah a tar lang.
“Warning: Heng lawngte hi kan DANNA hnaihah lo kal se, NUAI CHIMIH nghal an ni ang,” a ti.
US leh Iran hi Pakistan-a inbiak vawi khatnaa inremna an siam theih loh hnua Pathianni khan Trump-a’n tuikawng dan a nih tur thu a puang a, India huna Thawhtanni zan dar 07:30 atangin hman tan a ni.
US hmalakna hian kar hmasa Thawhlehni atanga an kalpui tan, ram pahnihte inkara chawlhkar hnih chhung inkahhai an puan tiderthawng theia ngaih a ni.
United Kingdom Maritime Trade Operations (UKMTO) center chuan US-in a dan hi Iranian lawng chawlhhmun leh tuialhthei terminal nena inzawm lawngte tan ‘danglamna awm lovin’ hman a nih tur thu a chhuah.
British lawng sipaite nena inzawm UKMTO chuan thurawn a tihchhuahah, “He khapna hian Iranian tuipui kam zawng zawng a huam a, lawng chawlhna leh energy hmuhma pawh a huam tel,” a ti.
Inkahhaiah hian Iran chuan Strait of Hormuz a hawng dawn tih tar lan ni mah se, tuikawng pawimawh takah hian lawng kal an la tlem hle tho.
Iranian thuneitute chuan US-in Israel hnena Lebanon beih chhunzawm a phalsak chu inkahhai bawhchhiatnaah an puh a. Inkahhai atana palai, Pakistan chuan Lebanon telin indona chhehvela mite zawng zawng inremnaah hian a huam niin a lo sawi tawh.
Trump-a’n Iran lawng chawlhhmunte a kharna hian Iran economy chhe tak a tihchhiat zual a rinawm a, Iran-in Hormuz-a a thuneihna a tihnep emaw, energy man a tihhniam emaw a rinawm loh bawk.
Islamabad-a Tehran inbiakna team kaihruaitu, Iranian parliament speaker Mohammad Bagher Ghalibaf-a chuan Pathianni khan US lawng sipaite hmalakna American-te tan petrol man a tisang dawn lek zawk niin a lo sawi tawh.
Tunah hian US-ah petrol gallon khat (litre 2.8) man $4.12 aiin a sang tawh a, indona hma khan $3 tling lo a ni.
Iran chuan a ram chin tuipui hum a tiam a, lawng sipai nena an ram dan chu ‘insuamna’ ang a nih thu a sawi.
Islamic Revolutionary Guard Corps (IRG) pawhin indona a chhunzawm leh a nih chuan Iran chuan theihna thar a lantir dawn tih an sawi.
Hormuz chungchang leh Iran-in nuclear program a neih zel phal leh phal loh chungchanga Islamabad-a darkar 21 chhung inbiakna kha Inrinni zan atanga tan a ni a. Pakistan chuan dawr chhunzawl a tum tih a sawi.
Pakistani Prime Minister Shehbaz Sharif-a chuan Thawhtanni khan, “Pakistan hi remna leh muanna a awm theihna tura hmalakna kalpui zel turin a inpeih reng a ni,” a ti.
Trump-a pawhin a hnu lawkah indawrna kawng hawng reng a nih thu a sawi bawk a. “Tukin zing khan mi tak takten min ko va, inremna siam an duh a ni,” a ti.
Trump-a hmalaknain khawvel economy tichhe dawn – Iran
