Trump-a hun tiam a liam mek laiin a palaiin Moscow tlawh dawn

US President Donald Trump-a’n Kremlin hnenah Ukraine nena an indona titawp tura hun a pek a liam hnai zel a, hetih lai hian a special envoy Steve Witkoff chuan Moscow tlawh a dawn a, Russia chuan indona mualah a tha a la thlah lo zel bawk.
Trump-a hian Russia hi Zirtawpni thleng hun a pe a, indo a tawp lo a nih chuan na taka Washington-in a hrek tur thu a sawi.
Trump-a vauna hian Kremlin erawh a la sawi che lo hle niin a lang a. An lakah Ukraine-in ram leh a mite a la hloh zel.
Witkoff-a chuan Israel leh Gaza a tlawh hnuah Nilaini emaw, Ningani emaw hian Russian khawpui a tlawh dawn niin Trump-a chuan a sawi.
Trump-a’n a vau hnuah pawh Russian President Vladimir Putin-a chuan Ukrainian khawpuite a bomb zui reng a, indona a titawp a nih loh chuan a sumdawnpui ramte, China leh India telin, chhiah sang tak lakah a vau a ni.
Kremlin thupuangtu, Dmitry Peskov-a chuan Thawhtanni khan Trump-a palai lo kawm an duh thu a sawi a. “Moscow-a Pu Witkoff-a lo biak hi kan duh reng a ni,” a ti a. “Inbiakna hi pawimawh, awmzel nei leh tangkai a nih pawh kan beisei,” a ti.
Trump-a chuan Pathianni khan Russia hrekna tuar lo tura an awm a rinawm tih a sawi a. “Nungchang fing tak an nei,” tiin a sawi.
Kremlin hian February, 2022-a an thenawm an rûn atangin ram dangin an nasa a; mahse, an tuar nep angreng hle.
Ukraine chuan hrek hian Moscow-in indona hmanrua a tlakchham phah nia sawiin khawthlang rama a thawhpuiute chu na zawka hrek turin a duh a. Ukrainian President Volodymyr Zelenskyy-a chuan Thawhtanni khan US, Europe leh ram lian dangte chu Moscow energy, sumdawnna leh trade banking-ah hrek belh turin a ngen.
Indo tihtawp tuma hmalakna a awm mek lai leh Trump-a hun tiam pawh a tawp hnaih mek laiin Putin-a erawh a chet danah a la hriam hle a. Zirtawpni khan hypersonic missile thar, Oreshnik chu sipaiten an hmang thei tan tih a sawi.
A khawnbawl lawk zinga pakhat chuan Ukraine indona hian Russia leh US ralthuama inep zawngin a nawr niin a sawi.
Russia-in UKraine a rûn hnuah UN chuan Ukrainian civil mi 12,000 an thi tawh niin an sawi a. Hei hi Trump-a pawhin tun hnai thla thum chhungin indo a tawp theih nana hma a lak nasat zual phahna a ni.