Ukrainian President Volodymyr Zelensky-a chuan Hungary-a Donald Trump-a leh Vladimir Putin-a inbiakna turah an sawm ve a nih chuan tel a inpeih thu a sawi.
US leh Russian president-te hian Ningani khan phone-a an inbiak thu sawiin Ukraine-a indona sawi dun turin Budapest-a inbiak an rem ti tih an sawi a, an inbe thuai tura ngaih a ni.
Thawhtanni khan Zelensky-a chuan, “Kan pathuma indawr tura sawmna kan dawng a ni emaw, palai hmanga indawr tur tih a ni emaw pawhin kan pawm ang,” tiin thuthar lakhawmtute hnenah a sawi.
Hetih lai hian Zirtawpnia White House-a Trump-a nena an inbiaknaah khan thu lawmawm a dawng lo niin chanchinbuten an chhuah a, US hian Ukraine hi Russia-in indo tihtawp a nih theih nana a duh dan zawm turin a lo ti niin an tar lang.
Zelensky-a hian US a tlawh hnua thuthar lakhawmtute a kawmna hmasa berah hian hemi chungchang hi a sawi lo va; mahse, lehlam lehlam hi kawng hrang hrangah inrem lohna an nei tih erawh a sawi.
An inbiakna chu langtlang tak a nih thu a sawi a, Trump-a hnenah hian a duh ber chu muanna a nih thu leh rang taka thleng tur pawha a beisei loh thu a hrilh tih a sawi.
Trump-Putin inbiakna tur, Hungary pawh a sawisel a, Prime Minister Viktor Orban-a hi Kyiv leh EU hruaitu tam takin Kremlin sangawizawnpuia an ngaih a ni a, ‘Ukrainian tana thil tha tur emaw, inbuktawk thil emaw an tih a rinawm loh’ niin Zelensky-a chuan a sawi.
Zirtawpnia thuthar lakhawmtuten an kawmnaah Budapest inbiaknaah Zelensky-a a tel ve dawn em tih zawhna chu Trump-a hian ‘tute tan pawha hahdam taka awm theihna’ a duh tih zawng a sawi.
“Pathum kan tel dawn a; mahse, a hrangin a ni ang,” a ti a. Hruaitu pathumte chu ‘awm khawm hun’ an nei dawn bawk niin a sawi.
Budapest-a inbiak tur inbuatsaih nen hian Russian Foreign Minister Sergei Lavrov leh US Secretary of State Marco Rubio chu phone-in an inbe tawh bawk niin Thawhtanni khan Moscow-in a sawi.
Zelensky-a hian indo mekah inkahhai puan an inpeih reng tih a sawi a; mahse, Ukraine hian ‘min rûntute engmah pek kan tum lo’ tih a sawi tel.
Moscow hian Ukraine chhimchhaka region pali – Donetsk, Luhansk (a pahniha Donbas an tih), Zaporizhzhia leh Kherson atanga Ukrainian sipaite an inhnuhdawk vek an phut a. Kyiv leh a thawhpuite chuan an pawm thei rih lo.
Russia hian Ukraine hi February, 2022 atang khan bei tanin an ram 20% chuang a thununsak mek a, Donbas pum deuhthaw a thunun tawh a ni.
Trump-a leh Putin-a inbiaknaah Zelensky-a’n tel ve inhuam
