US President Donald Trump-a chuan karleha King Charles leh Queen Camilla ten an ram tlawh tur chuan UK nena an inlaichinna siam thatna kawngah a pui thei dawn niin a sawi.
BBC-in phone-a a kawmnaah Trump-a chuan, “Pa pui tak a ni a, ka chhanna chu chiang takin ‘aw’ tih a ni,” a ti.
“Ka hre chiang hle a, kum tam tak ka hre tawh a ni,” a ti a. “Mi huaisen tak a ni a, mi ropui tak a ni bawk. Thil lawmawm tak a ni ngei ang,” a ti.
President hian UK Prime Minister Keir Starmer-a nena an inkar chungchang pawh a sawi a, pemte dawnsawn leh pawm dana kalphung a thlak danglam chauhvin a ‘dam leh thei’ tih a sawi.
King leh Qieen hian Thawhtanni atang hian ni li cham turin US an pan dawn a, White House-ah Trump-a hi an hmu dawn.
King hi president nen an inkawm ang a, Congress-ah thu a sawi bawk ang.
Washington DC-a ni hnih an awm hnuah New York, Virginia leh Bermuda-ah te an zin ang a, UK-ah an kir leh ang.
Foreign Office chuan an ram lal an zin tur chu US zalenna kum 250 tlin lawmna a nih tur thu a sawi a, thawhhona ‘thang duang, himna leh chanchin hlui’ lawmna a ni dawn tih a sawi bawk.
Ningania minute nga chhung an kawmnaah Trump-a hi UK Prime Minister Keir Starmer nena an inlaichinna chungchang zawh a ni bawk a. Iran indona kal mekah hruaitu pahnihte hi an inmil lo niin a lang a, Sir Keir-a hian US-a UK palai atana Lord Mandelson-a ruat a tum avangin nawrna a tawk mek bawk.
Thawhtanni khan Truth Social-ah Trump-a hian Lord Mandelson-a palaia dah tum chu duhthlanna chhe tak a nih thu a sawi rualin prime minister hian thlak leh theihna hun tam tak a nei tih a tar lang.
Trump-a hian UK chu North Sea-a tuialhthei leh boruakalhthei lak chhuah tipung turin vawi tam tak a lo ngen tawh bawk.
President hian Iran indona chungchangah UK sorkar leh a tanrualpui ram dangte pawh a sawisel nasa hle a. Trump-a hian UK-in a thlawpna chinah a lawm loh thu a sawi a, Sir Keir-a hian an ram chu ‘indonaah’ hruai luh a nih loh tur thu a sawi nawn ve bawk.
Trump-a’n British lalten an tlawh turin US-UK inkar a tihthat beisei
