Trump-a’n Strait of Hormuz chungchangah Japan a chet beisei

Trump-a’n Strait of Hormuz
chungchangah Japan a chet beisei
US President Donald Trump-a chuan White House-ah Japanese Prime Minister Sanae Takaichi-i chu Ningani khan lawm taka lo dawngsawngin NATO tangrual ang lo takin Japan chu Iran chungchangah ‘a ke a pen chhua’ a rin thu a sawi.
Trump-a hian a thawhpui ramte chu US-Israel sipai beihpui thlak an thlawp danah a sawisel a, US-in tanpuina engmah a mamawh lo tih a sawi bawk a. Hetih lai hian buaina avanga Iran-in Strait of Hormuz a khara chil puah bomb (mine) an dahte senghawia bungraw phurtue kalpui (escort) tur lawng tam zawk tir turin a la nawr reng a ni.
Hruaitu pahnihte an inkawm hma hian Japan chuan Europe-a ram liante nen thuchhuah intawm siamin energy-a sumdawnna tihngheh tumin hma an la dawn tih a sawi a, Strait-a him taka kal theihna tura ‘hmalakna’ zawm turin an inpeih thu a sawi.
Trump-a chuan thla hmasaa Takaichi-i’n inthlanah hnehna a chan chu Oval Office-a a lo hmuaknaah ‘record siam’ tiin a lo fak hle a. Iran telin ‘sumdawnna leh thil dang tam tak kan sawi dun dawn’ tih a sawi.
“Engkimah Japan nen hian thlawpna leh inzawmna kan nei a. Nizan, a hma lam thlengin Japan hi a bulthumah tangin NATO ang lo takin a pen chhuak ang tih ka ring,” a ti.
US-in hma a lakna leh sipai sang tam tak a daha a chetna chu Japan hian tha taka a thlawp a beisei thu a sawi bawk.
Trump-a chuan, “Thil tam tak kan mamawh lo; engmah kan mamawh lo,” a ti a. “Japan atangin emaw, mi dang atangin emaw engmah kan mamawh lo; mahse, mi an lo che chhuak hi a remchang hle a ni,” a ti.
Takaichi-i chuan Trump-a hnenah hian ‘khawvel energy sumdawnna boruak buai tak tihrehna tur rawtna danglam bik a keng’ tih a hrilh a, Iran chu nuclear ralthuam neih phalsak a nih ngai loh tur thu a sawi bawk.
Takaichi-i chuan Strait of Hormuz-a Iran chet dan chu a dem thu sawiin Trump-a chauhvin remna a thlen theih a rin thu a sawi a. Middle East-a buaina chhuak vangin khawvel eibar dinhmun a tlahniam dawn tih a sawi bawk.
Hetih rual hian Takaichi-i hian Tokyo-in Iran a biakpawh tawh thu a sawi bawk.
Washington ang lo takin Tokyo hian Tehran nen palai an nei tawn a, hei hian indona tihtawp theihna tura hmalakna engah pawh indawr theihna kawng a siam a. Hetih rual hian Japan-in kum 2019-a Tehran nena inremna siam a tumna erawh a hlawhtling bik lo.