Trump-a’n vau mah se Taliban-in Bagram hlan tum lo

Taliban chuan US President Donald Trump-a’n vauin Washington-in kum 20 chhung Afghanistan indo laia an hman Bagram airbase chu an kuta hlan turin ti mah se an pawmsak chuang lo.
Taliban hian Pathianni khan ‘Afghanistan-in mahni kea ding a nihna leh ram pakhat a nihna chu a pawimawh ber’ tih sawiin US chu an ram chhunga an sipai chhawp a tuma inremna neihpui a tumna bânsan turin an ti.
Afghanistan-a roreltute hian tun hmaa an lo tihsual tawh ang thlentir tawh loh an tum tih an sawi a ni.
Bagram hi Afghanista-a US sipaite hmun lian ber thin niin Kabul hmar lam km 50 vela awm a ni a, kum 20 chhung Taliban dova an chhuah lai khan US leh a thawhpui sipaite hmunpui ber a ni a. Indona kha September 11, 2001-a al-Qaeda-in New York leh Washington a beih vanga chhuak niin kum 2021-ah a tawp a, Washington chuan Afghanistan hi a chhuahsan zui a ni.
An hmunah hian US sipaite hian ‘firfakte laka indona’ an tih mai an kalpui chhungin an chungthu rel lovin mi sang tam tak an tantir a, thenkhat chu nasa taka sawisak pawh an awm.
Taliban hian kum 2021-a US sipai la chhuaka Afghan sorkar a tluk rualin an la lehnghal a ni.
Kar hmasa khan Trump-a chuan airbase hi neih leh a rilruk tan.
“Afghanistan nen kan indawr a, lak let leh kan duh a, rang takin kan duh bawk a. An phal lo a nih chuan a tih dan kan dap ang,” tiin Inrinnia White House-a thuthar lakhawmtute a kawmnaah a sawi.
Trump-a’n neih leh an duh tih hi kar hmasaa UK a tlawha Prime Minister Keir Starmer-a nen thuthar lakhawmtute an kawm tum khan a ni.
Afghan thuneitute erawh chuan an rama US awm leh hi an duh lo hle a. Foreign ministry thuneitu, Zakir Jalaly chuan, “Afghan-te hian kan rama ram dang sipai awm hi kan pawm ngai tawh lo vang,” a ti a. Hetih rual hian ram pahnih hian ‘eibar leh politics-a inzahtawna tum thumhmun neia indawr erawh an mamawh’ tih a sawi.
Bagram hi Cold War laia Soviet Union-in an sak niin Afghan sorkarin Moscow thlawpna nena kum 1950 chhova a din kha a ni a. Soviet-in beihpui an thlak laiin an hmunah hmang zuiin kum 1980 chhova an chhuahsan thlengin an luah.
US hian Afghanistan an luah khan chei tharin khaw lian tak angah an chhuah leh a, US sipai an awm thin.