Trump-Modi inkawmngeihna India-in tuar dawn – Congress chief

Trump-Modi inkawmngeihna India-in tuar dawn – Congress chief
US-in Indian bungrua a lak luha chhiah sang tak a lak chungchangah Congress President Mallikarjun Kharge-a chuan US President Donald Trump-a leh Prime Minister Narendra Modi-a chu thian tha tak an ni thei a; mahse, ‘ram hmelma a la ni dawn’ niin a sawi.
Kalaburagi, Karnataka-a Pathiannia thuthar lakhawmtuten an kawmnaah Rajya Sabha-a Leader of Opposition chuan Modi leh Trump hi thangthat lak tum ve ve an nih avangin thian an ni thei tih a sawi.
Kharge-a chuan Modi-Trump thawhhona chu India-in a la tuar thei niin a sawi.
“Trump-a leh Modi-a hi thian tha an ni thei a; mahse, Modi-a hi ram hmelma a la ni dawn a, boruak a tikhawlo vek a ni,” a ti.
US-in India atanga bungrua a lak luha chhiah sang a lakah Kharge-a chuan, “Trump-a’n tariff sang tak a la a, hei hian kan mite a tichhia,” a ti.
“A ngaihdana kalin an ram mipui a humhim a, hei hi a chhan chu a ram a dah hmasa a, inthian thatna chu a hnung zawkah a dah vang a ni,” tiin a sawi.
Kharge-a chuan Prime Minister Modi-a chu India-in ram dang a kawmngeih thin danah kum tam tak chhung tan lam nei lo leh kawmngeih fal bik nei lova a lo kalna chu zawm turin a ti a, chu kawng chu a zawh ve ngei tur a nih thu a sawi.
Tun hnaia GST lak zat bi tihhniam chungchangah Kharge-a chuan Congress party chuan mi retheiten an hlawkpui tur thil chu tha an ti em em vek tih a sawi a, hetih rual hian BJP sorkar chuan kum tam tak chhung mipui tawrhna an thlen tawh niin a sawi.
“He thil hi kum riat kal taah kan lo aupui tawh a. Thuah hniha a tihniam hi mi retheiten an hlawkpui danw tih kan sawi a, hetih lai hian thuah li thuah ngaa tisangin mipui an lo rawk tawh a. Inthlan a lo hnai a, thil a harsa tih hriain GST lak zat an tihniam leh ta zawk a ni,” a ti.
Kharge-a chuan Modi-a’n a hmaa China nena ramria buaina a awm laia ‘tu mahin Indian ram chin an dai lo’ tia a sawi laiin tunah chuan ‘Modi-a ngei China-ah a lut ta zawk’ tiin a sawi.
Congress president chuan ram thatna tur thilah chuan eptute pawh sorkar lamah an tang tih a sawi a, chutihrual chuan Modi-a chuan an thlawpna chu hmang sual lo se a duh tiha sawi tel.
“Ram tan a nih chuan kan inthurual thin a. Mahse, hei hi a thu thua thil ti turin kan thlawp tihna a ni lo va, kan phal lo,” a ti a. Kharge-a chuan Modi-a chuan khawvela India tanna thin a tichhe vek niin a sawi bawk.
“India dinna thin kha ‘Trump-a hi ka thian tha’ tih leh ‘Trump, vawi khat dang leh’ tia a sawi khan a tikhawlo vek tawh a ni,” a ti a. India chuan a indan tirh atangin kawmngeih bik ram a nei ngai lo va, chu chu tunah hian a kalsan hle tawh niin a sawi a ni.