ZPM hruaitu Lalduhoma chu tualthat nia ngaih theiha social media lama puhnaah mi pahnih man an nih tawh laiin, a puhtu ber chu man chhuah a la ni lo tih ZPM party chuan an sawi.
ZPM Media & Publicity chuan an party, a bikin chief ministerial candidate leh an leader Pu Lalduhoma chuan beih a tawk nasa a, an beihna nazawng chu chhan kher tul a tih loh thu amahin a sawi bakah party pawhin engemawchen chu enliam mai mai an tum laiin, thudik lo hmanga beitute chu sim tawh turin an ngen tih an sawi.
ZPM chief ministerial candidate chuan hman ata tawh thudik lo hmanga beihna a tawk zing a. Heng mite hian ZPM leh amah Pu Lalduhoma an huphurh vangah an ngai mai a, social media lamah phei chuan tual that ang thawthangah te puh a ni tih ZPM hian an sawi.
He thil phei hi chu an ngai thutak hle a, kumin May khan court-ah criminal complaint an thehlut a, kumin June 12 khan court hian Cyber Crime Police Station hnenah investigation report thehlut turin a ti a. Mi pahnih man an ni tawh a, he thila phusa ber, Facebook-a ‘Tlangval U Hranga’ inti, fake account erawh tun thlengin man a la ni lo tih an sawi. An beisei ai chuan a chhuitu lam hian an chhuichhuak har deuh tawh nia an hriat thu an sawi nghe nghe.
ZPM leh an leader beitu tharlam ber chu an opposition pui Congress party an nih thu sawiin, rorel lai party MNF beih tur an awm reng lai a, mahni opposition pui an bei chu mak an tih thu an sawi a ni.
MNF chu an insawi ang a nih chuan NDA atanga inhnukdawk ngam turin an ngen tih ZPM party hian an sawi bawk.
Tunhnaiah BJP sawrkarna hnuaiah Manipur-ah tualchhung buaina nasa tak a chhuak a. Zofate nekchepa awmin, thisen pawh a luang hnem tawh hle, tiin, hetih laia MNF party-in BJP a thawhpuina tun thlenga a la hnukdawk ngam lo chu mak an tih thu an sawi. Tunhnaia chief minister Pu Zoramthanga thusawi chu a dinna tak tak a nih chuan NDA atanga inhnuhdawhna tur nia an ngaih thu an sawi a ni.
“Pu Zoramthanga hian a insawi anga BJP hotupa Modi hi a hlau lo takzet a nih chuan, Manipur-a kan unaute chunga an thil tih avang chauh tal pawh hian BJP an thlawpna, NDA atanga inhnukdawk ngam turin kan ngen a ni,” ZPM general secretary Eddy Zosangliana Colney chuan a ti.
Tualthata Duhoma puh tumnaah a puhtu ber la chhuichhuak lo
