Tualthihna vangin MHIP pungkhawm
A pasalin rawng taka kut a thlakna avanga nunna chan nia sawi Rebecca Chanchinthangi chunga thil thleng an duh loh zia lantirna atan leh pawikhawihtua puh a pasal chu dan ang taka a chunga rorelna pek phutin Thawhtanni khan MHIP Gen. Hqrs huaihawtin Aizawlah punkhawm (peaceful demonstration) a ni.
Heta tel ve Women & Child Development minister Lalrinpuii chuan, hmeichhiate chunga hleilenna rapthlak tak tak hriat tur awm ta fo mai chu zahthlak leh lungchhiatthlak hlea a hriat thu a sawi a. Mahni in lumah ngei pawh hmeichhiate an him ta lo nia langte, an kawppuite kut ngei tuara vanduaina an tawk ta fo maite chu hriatthiam har a tih thu a sawi. Danin a kawng a zawh ngei theihnan, hmeichhiate chunga hleilenna chu a thlen tawh lohna turin hma lak a ngai tih sawiin, mipate pawh heng hleilenna lakah hian venpui turin a sawm.
India ram danpuiin mi zawng zawng tana zalen leh zahawm taka nung tura dikna chanvo a pek dan minister hian a sawifiah a. Hmeichhia tute pawhin hetiang lama harsatna an tawk a nih chuan engtik lai pawhin helpline number 181 call theih a ni tih put darhpui theuh turin a sawm bawk.
MHIP president Ngurmawii Sailo pawhin hmeichhiate chunga hleilenna dodalna thu tawi a sawi a. MHIP Gen. Hqrs Executive Committee member Lalhmuchhuaki kaihhruaiin kalkhawmte hi hleilenna leh tualthihna an duh lohna bakah pawikhawihtu a phu ang ngeia hrem tura thuneitute ngenna aurual pui a ni.
Mizo Hmeichhe Insuihkhawm Pawl Gen. Hqrs hian thuchhuah siamin, an hmeichhiatpui Rebek Chanchinthathangi (42) Salem Veng, a pasal C. Lalsiamliana’n a sawisa hlum tih sawiin, an dem takzet a, tualthattu C Lalsiamliana chu dan anga a na thei ang bera hrem an phut tih a sawi.
‘C. Lalsiamliana’n a nupui Rebek Chanchinthathangi khawlaiah a fate hmuh lai ngeia saruaka a sawisa hi kan ngaithiam thei loa, tualthattu hian a phu tawk hremna hmu ngei se kan duh a, thuneituten dan anga na taka an hrem kan phut tlat a ni. Mizo hmeichhiate chunga kutthlak leh thihna a thleng fo hi vanduaithlak kan ti a, tunhnuah hetiang tualthahna rapthlak hi thleng tawh lo se,’ a ti.
Mizo mipate chu Mizo hmeichhiate innghahna leh venghimtu, an thlamuanpui thin an ni, tiin, Mizo mipa mitha leh innghahna tlak tam tak an awm lai a, hmeichhe awm nem zawk kutthlak duh tawk mipa rilru pu an lo awm thin chu MHIP chuan pawi a ti tih a sawi. Tunhnuah chuan Mizo hmeichhiate tan thlamuanpui tlaka awm zel tawh turin Mizo mipa an ngen tih a sawi bawk.
Tualthihna vangin MHIP pungkhawm
