Kuminah ruah tui a tam a, ruah tui a tam avangin mipuiin harsatna an tawk hial. Chutih laiin Aizawlah tui a harsa lawi a, mipuiin tui harsatna an tuar mek.
May thlaah ruah a tam a, June-ah pawh a tam. July-ah pawh a tla tha rih khawp mai a, mahse Aizawl mipuiin tui harsatna an tawk.
Tunlaiin tui chawi motor an lun a, tui lei duh an tam avangin tui chawi motor-te’n hna an hmu tha hle.
Motor-a tui chawi thinte chuan tui lei duh an tam thu an sawi a, kum tir lam atang khan kuminah tui lei duh hi an tam reng tih an sawi.
An sawi danin, January atanga April vel thlengin kum dangah chuan hna an ngah thin a, ruah tui tlak tak tak hma, kum chawhma lam hi tui lei duh an tam hun a ni thin. Kuminah chuan May, June leh July-ah pawh tui lei duh an la thahnem reng.
State Meteorological Centre-a an chhinchhiah danin, May thlaah khan ruah tui mm 519 a tla a, kum dang May-ah hetiang zat hi a sur ngai lo. June-ah mm 353.7 a tla a, hei pawh hi tam tham tak a ni. July-ah pawh ni 20 thleng khan ni 4, ni 5, ni 6, ni 7, ni 9, ni 13 leh ni 19-te tih loh ni dangah chuan ruah a la sur ziah a, tam tham taka a sur chang pawh a awm. Ruah tui a tam a, mipuiin ruah tui tam vanga harsatna an tawh rual chiah hian tui harsatna pawh mipuiin an tawk.
May ni 28-a remal cyclone leh ruah vang khan Aizawl tui lakna khawl a chhia a, thla hnih dawn hnu-ah pawh mipuiin tui an la dawng tha lo!
Kumin hian remal cyclone tleh hma khan tui hi a harsa tawh sa a, cyclone vanga harsatnain a chhunzawm bakah, cyclone tleh hnua tui harsatna hi a rei ta hle.
Tui chawi thenkhat chuan tui leh duhte an pe seng lo a, nghah an ngaih chang a awm tih an sawi a, a tui chawi turin a daih loh chang a awm tih an sawi bawk.
Connection tui an hmuh that loh avangin mipuiin harsatn an tawk tih an sawi a, tui a haw pawhin a haw tlem tih chu anmahni dawrtu sawi dan a nih thu tui chawite chuan an sawi.
Aizawlah tui hi Rs 1200-in litre 2000 an pe thin a, ni khatah chhungkaw 10 te, chu aia tam te an pe thin.
Tui a tam a, tui a harsa
