Tui nu a zia, a lak tlak ta

Nilaini khan Tlawng lui a fim ta deuh a, sem tura lak tlak a ni ta hlauh mai. Mahse, ruah a tam chuan rei lo te chhunga nu leh vak thei a ni, an ti.
April ni 28-ah lak tlak loh khawpin Tlawng hi a nu a, a tukah a zia ta hlauh. Thu dawn danin, ni 28 zan dar 12 vel thleng khan Reiek kaiah NTU 1000 a kai a, zan lamah ruah a sur lo a, a tukah chuan NTU 300 vel a ni tawh.
‘NTU 300 vel a nih takah chuan kan pump ta a, single-in kan pump phawt a, chawhnu lamah chuan double-in kan pump,’ tiin PHE department lam chuan an sawi.
A pangngaiah chuan Tlawng lui hi NTU 30 te a ni thin. Chu aia nu te pawh a ni fo a, mahse a pangngaiah chuan NTU 100 a pel ngai lo an ti. Chutiang vel chu a ni a, Tlawng lui hi a pangngaiah chuan a fim.
Tui hi NTU (Nephelometric Turbidity unit) 5 a nihin mipui hnena sem tlakah ngaih a ni a, PHE department hian an tui pump hi NTU 5 emaw a aia fim emaw a nih theih nan a tihfimna hmangin an tifim thin. Mahse, NTU 1000 te hi chu tihfim chi-ah ngaih a ni lo.
An sawi danin, NTU 500 te pawh ni se an tifim tho a, NTU 700 chung lam hi chu a tihfim a hautak bakah, a him lo ang tih te pawh a hlauhawm. NTU 1000 vel phei hi chu pump chi-ah ngaih a ni lo.
Nikum leh a hma kumah te pawh Tlawng lui hi pump chi loh khawpin a nu fo a, a nut telh telh bakah a nu ngun telh telh nia sawi a ni.
A hma chuan a nut dan tehna khawl an neih khan NTU 1000 thlengin a teh thei a, a tehnaina a teh phak loh khawpin kum hmasa lamah khan a nu fo mai. Khawl thar an nei a, 1000 chuang a teh thei tawh. April ni 28-ah khan Greater Aizawl Water Supply Scheme Phase I leh Phase II hnuaia tui an lakna Reiek kaiah a nut ber laiin NTU 1508 a ni a, Phase III hnuaia tui lakna Setlak lamah NTU 1700 te a kai.
Zanah ruah a sur lo a, a tukah a lo fim ta deuh hi, department lam chuan a nutna a hnai tihnaah an ngai a, ruah a sur nasata hmun hla deuh leh hmun hnai deuhahte a nu a nih chuan rei tak tak a nu thin an ti. Nikum lamah khan hun rei tak tak an pump loh tum a awm.
Leivung leh bawlhhlawh vanga nu a nih ber thu an sawi a, a hma kha chuan bawlhhlawh paih vangin a nu a, leivung paih a nasat hnu hian a nut zual bakah a nu ngun an ti. Hmun hla tak taka leivung leh bawlhhlawh paihin Tlawng hi a tinu thei tih an sawi a, leivung km 1 chuanga hlaa paih pawh ruahin a len lut leh tho tih an sawi. Ruah a sur leh vak a nih chuan tui hi a nu leh vak ang tih a hlauhawm thu an sawi a, ruah a tam a nih pawha a nut chuan loh nan leivung leh bawlhhlawh paih kawnga fimkhur tlan a tul thu an sawi bawk.