Mizoram-in tuialhthei a mamawh dan hi thla khatah kilolitre 8500 vel a ni a, tuna kawng that loh avanga duhthala an la tlan theih loh avangin 1000 KL velin mamawh zat ang hi lakluh theih a la ni lo.
Petroleum Entrepreneurs’ and Transporters’ Union of Mizoram (PETUM) thuchhuak chuan, tunhnaiah Mizoram Commercial Vehicle Union-in oil tanker a lo lut tha hle an tih chu, oil tanker-te hi kawng a la that tawk loh avangin an thlen hun tur angah an hleng hman loa, a let dawnin an tlan tlem a, hei vang hian tuialhthei lakluh kawngah duhthu a la sam lo hle tih a sawi.
Petrol pump-te pawhin duh angin hralh tur an dawng thei loa, Mizoramah tuialhthei mamawhna hi thla khatah 8500 KL a nih thin lai a awm a, tunah chuan 7500 KL chauh lakluh a nih avangin Kolasib district-a petrol pump-te tih loh hmun dang zawng amite chuan duhkhawp hralh tur an nei thei meuh lo tih a sawi a ni.
Petrol pump-te chu hralh chhuah tur bituk sa nei an nih avangin an sumdawnna a kal that theihnan tan lak ngai viaute pawh an awm thin tih PETUM hian a sawi a. A black-in an hralh loa, a dawrtu customer-te hnenah an hralh mai chauh tih sawiin, ‘Hetianga thudik tawk lo leh dan kalha tihsual a awm hriat a nih loh lai a, thu inchhuah khum hi hriatthiam harsa kan ti a, pawl dangin kan sumdawnna an duh dan anga kawih her an tum hi kan hrethiam lo a. Petrol pump tam zawk hi oil tanker neia lirthei hmanga eizawng ve tho kan ni a, thu inchhuah khum tawp loa thu chiang zawk inhriat sak a, inbiak tlan zawk thin nise a lawmawm ang,’ a ti.
Sawrkarin an hralh chhuah theih chin tur a bithliah sak (security stock) bak chu mipui mamawh ang zelin an hralh thin a, stock a tam phei chuan an mamawh ang zat an pe mai zel tih sawiin, ‘Tax pe kan nih avangin kan hralh chak loh chuan nasa taka hloh theih a ni a. Sawrkar thuneitu thenkhatten petrol pump-te licence tihtawp sak hiala vauna an sawichhuak thin hi a tha kan ti lo a, hetianga ti lo a thil awmzia hrechiang tura sawiho thin ni zawk se kan ti a ni,’ thuchhuah chuan a ti bawk.
Tuialhthei mamawh zat atangin kilolitre 1000 velin la lalut tlem
