Tuipuia Russia veng turin UK leh Norway inrem

Tuipuia Russia veng turin UK leh Norway inrem
UK leh Norway chuan Atlantic hmar lama Russian tuihnuailawng veng turin an thawkhona thuthlung an ziak.
Tui chhunga hrui zamte venna tur a ni a, British thuneitute chuan Moscow atangin tihthaihna a tam a, kum hnih liam ta chhung khan UK tuipuiah Russian lawng hmun 30% zetin a pung niin Ministry of Defence (MoD) chuan a sawi.
Inremnaah hian Nato ram pahniha lawng sipaite hian British siam Type-26 frigate an enkawl dun dawn a ni.
UK Prime Minister Keir Starmer-a chuan inremna chu ‘chhinchhiahtlak’ tia sawiin UK-in an thil pawimawhte a venna kawngah a chak lehzual dawn tih a sawi.
Sir Keir-a hian Norwegian Prime Minister Jonas Støre chu Ningani khan Scotland hmar lama RAF Lossiemouth-ah a dawngsawng a. Hruaitu pahnihte hian maritime patrol crew-ten laser hmanga tun hnaia RAF thlawhna khalhtute chhuntu, spy ship Yantar tela Russian lawngte chetla an en dan an hrilh fiah.
Russia chuan Yantar hi Ministry of Defence-in an enkawl niin oceanic research vessel a ni tih an sawi a. Khawthlang ramte chuan European tuipuiah a chetla hmu fovin tui chhunga hrui zam a thlithlai niin an sawi.
Britain hi tui chhunga hrui a zamah hian a innghat thui hle a. Britain atanga North Sea-a an thenawmte nen boruakalhthei pipeline an thlung nasa hle bawk.
Lunna House agreement tia an sawi inremna hi UK leh Norway anti-submarine 13 vel an tel dawn a, heng zinga panga hi Norwegian ta tur niin Europe hmar lamah an thlithlai dawn a ni.
Indo lawng hmang hian Russian lawng sipaite Greenland, Iceland leh UK inkara an chet velna chhuiin British inbiakpawhna, electricity leh boruakalhthei inpekna atana pawimawh cable-te an veng dawn a ni.
UK leh Nato tangrualte hi tun hnaiah Moscow-in Ukraine a beih mekna karah tui chhunga hrui zam leh pipeline a tichhe mai ang em tih hlauhthawnna an nei lian hle.