Fooball-ah hian world record siama inlei thawm hriat tur a awm kal reng a; world record transfer thenkhat chu a leitute’n beisei ang he hua an hlawkpui lem loh a awm theih laiin ‘a man zat a petchhuak ve chiang alawm’ han tih turte pawh an awm bawk ang a; tuntum chu kum 50 liamta chhunga world record transfer hlawhtling zual top 10 kan thlirho dawn a ni.
10. Gareth Bale
Tottenham to Real Madrid 2013 (£86m)
Real Madrid thuam a inbel tawp lama Real Madrid star hlui ve bawk Predrag Mijatovic-a’n club tana rilru pe tawk lo, chu aia an ram leh golf ngaipawimawh zawk, Madrid chu a pathumna chauha dah tia a puh Gareth Bale khan Bernabeu-ah lawm leh zah hlawh loh hun nei mah se European title panga ngawt nena Madrid chhuahsan thei Welshman kha Spanish giants-in world record siama an lei zingah ‘lei fuh loh’ han tih tur ziazang a ni lo ang!
‘Wales, Golf, Madrid’ an tihkhum thin Bale khan Champions League final-ah goal thum thun tlingin, ani aia he competition final goal ngah zawk awmchhun chu Cristiano Ronaldo chiah kha a ni a, Liverpool laka Bale-a 2018 bicycle kick aia nalh leh ropui phei kha chu Champions League final chanchinah a awm kher lo mai thei!
Kum 2013-a pound maktaduai 86-a an sengluh Wales international hlui kha Madridistas lam khan lawm thang huam reng lo mah se Real tana goal 106 thun tling Bale kha world record transfer hlawhtling zual number 10 zingah a tel chiang hle a ni.
Gareth Bale hian Tottenham atangin Real Madrid a zawm a; Champions League final vawi hnihah La Liga club tan goal khungin, Europe title panga bakah La Liga title pathum leh Copa del Rey pakhat lakpui hmanin, super cup phei chu a hawnsak nual!
9. Ronaldo – Barcelona to Inter 1997 (£19.5m)
8. Ronaldo – PSV to Barcelona 1996 (£13.2m)
Brazilian Ronaldo zet kha chu a pui bawk a, kum zawnin transfer fee-ah world record a siam a, a khawi kha nge ropui ta zawk tih hi zawhna awm thei a ni ang!
Barcelona-in PSV atanga pound maktaduai 13.2 senga an lakluh hnu khan game 49-ah goal 47 a thun tling a, mahse, kum khat hnuah Catalan-ho khan Inter Milan lamah hlep neiin an hralhchhuak leh ta daih lawi a!
Kum 1997 khan a Ballon d’Or hmasaber pawh a hmin ta chiah reng a; Spain ramah khan cham rei lo mah se Bobby Robson-a enkawl Blaugrana tan khan Cup Winners’ Cup leh Copa del Rey tophy lakpui hmanin, Catalan giants-in hun rei deuh zawk ‘The Phenomenon’ an kawl lo kha a mak khawp mai!
Italy rama a debut campaign-ah khan khawvela defender tha ber ber hmachhawn chungin Serie A marker hming hraw pui puite ven rawn karah San Siro club tan inelna hrang hrangah goal 34 tehreng a khawl tling leh ngat!
Inter khan kum 20 mi lek ni chunga Brazilian theihna kha an hmuh chian avangin contract zawh hmaa leichhuak duhte tana sum phawrh ngai zat tur pawh an bilh hraw ta hle reng a; a record-breaking feet ngei mai hmang khan Milan club kha a luh kumah Uefa Cup lakpui nghalin, a hnuah phei kha chuan Nerazzurri captain a zui ta hial a; khelh 99-ah Inter tan goal 59 a thunsak tling.
San Siro-a a khawsak lai khan khup hliam teivet avangin a talbuai zawk a, chuti ni lo se San Siro club kha engtia takin chawi chhuak ang maw?!
November 1999 khan a hliam hmasa a tawngbua a, Inter khan world record fee dangin Christian Vieri an lalut leh ngat a; Ronaldo khan kum hnih chhungin Serie A game 10 chiah a khelhpui ta reng a; 2002 World Cup-ah chuan a dam leh tawh a, Brazil a han champion-pui te te a, Real Madrid lamah a insawn zui ta a nih kha.
7. Alan Shearer
Blackburn to Newcastle 1996 (£15m)
Kum 1996 nipui thawt lai kha club accountant-te tana sum khawih tur tam tum tak niin, July thla ral hmain Newcastle United khan Ronaldo record khumin Alan Shearer kha Blackburn Rovers atangin an lei chhuak ve ngat a ni!
Blackburn Rovers-a season thum a hman chhung khan Shearer a hlawhtling a, Premier League goal 30 chuang thunin, Euro 96 Golden Boot hial a khai haw a; a insawn dawn a nih rau rau chuan Manchester United emaw Real Madrid zawk emaw thlang awm tak a ni!
Chuti ta lo chuan ‘pound 15m homecoming’ thlangin Kevin Keegan-a enkawl Toon outfit zawm a titlu ta zawk a ni.
Magpies-ah khan a goal thun theih a chhawmlut chiang kher mai a, St James Park-a season season 10 a khawsak chhungin England striker hlui khan belhkhawmin game 405-ah goal 206 a tilut tling a, Premier League all-time top scorer a ni zui ta reng a ni.
Blackburn atanga Newcaslte United-in an leichhuahna man pound maktaduai 15 kha tunlai pawisa hlutna anga chhut chuan pound maktaduai 200 chuang a ni tawh ang!
6. Zinedine Zidane
Juventus to Real Madrid 2001 (£46.6m)
Champions League final history-a volley lungdum ber tih tur hlap luttu Zizou hian a man atana Real Madrid-in Juventus hnena an sum chhunluh hi a phu thlap a tih theih ang.
He Frenchman hian world record transfer fee fuh zual top 10-ah parukna a luah pha a; player a nih lai khan European trophy pakhat chiah lakpui zo mah se coach ni chunga a kirleh hnu khan Madrid chu a zawnin Champions League title pathum a lakpui thei ngat a nih kha!
Zidane hruaina hnuaia November 2002-a Clasico an khelh tum khan corner a chhuih dawn apiangin Barcelona fans lam khan an star hlui Luis Figo kha an lo vawm hman ziah a, an vawmna pakhat phei chu vawk lu a ni nghe nghe!
Barca fans chet dan avang khan second half-ah minute 20 dawn lai Nou Camp inkhel kha tihtawp lailawk a ni!
5. Luis Figo
Barcelona to Real Madrid 2000 (£37m)
Florentino Perez-a rawn president chhoh bawr vel lai leh he club Galactico era intan chhoh dawn lai bawr vela Figo transfer record kan hmuh hnu hian an mit it zawng hlah zen zen lo Real chuan a hnu kum 13 chhungin transfer record tum nga tehreng an siam zawn!
Perez khan election intiamnaah Madrid-a Barca plyer Figo hruailuh kha a telh a, Barcelona nen an inhmelmak nat zual chhoh lai kha a nih piah lamah Nou Camp-a Portugal star contract inbiakna an tihtawp lai a lo ni chho bawk nen boruak an nei lian kher mai!
Real Madrid-a lawmluh a nih lai khan Figo hmel kha nuam ti chiah lo hmel leh hahdam lo riauin lang mah se Bernabeu turf a rah rualin a class a pholang nghal at a; Madrid a thlen atanga thla reiloteah Ballon d’Or chawimawinain a nangching nghal!
Kha erawh a insawn hma chiaha Barcelona tana a chetthat vang niin, an hmelma huat ber lama a puanthuah a pulut mah Catalan-ho run tawk a tlin tawh tehlul nen an club tana a khelh lai behchhana footballer mimal chawimawina ngaihhlut berte zinga mi a han dawng zui leh zet kha chu Catalan club hliama chingal thlawr ang vel a ni!
An ui ngawih ngawih Portuguese midfielder-in an er leh el ber club a pansan hnua vawk lu ngei maia an vawm zui ta pawh kha a mawh lo e!
4. Roberto Baggio
Fiorentina to Juventus 1990 (£8m)
Khatih laia an hmelma lian Turin khaw lama Italian hralhchhuah a nih duh loa La Viola fans thinrimin Fiorentina president Flavio Pontello an tawng zet pawh kha a thawm a na a, Stadio Artemio Franchi kulhpui chhunga a sa himna zawnga Pontello tawmbo tlat pawh kha a mak lo e!
May 1990-a pound maktaduai riat kha a hun lai chuan world record a ni tlat!
Juve thuam inbel chunga Florence khawpuia Italy international hlui a kirleh boruak pawh kha a pui mep mep hle a; a club hlui laka goal thun theihna hun tha spot-kick a chhuih duh lo chung chungin purple scarf-a tuam engemawin a nghawngah an la zawmsak talh a nih kha!
Kum 1993-ah Juventus chu Uefa Cup trophy a lakpui a, kum hnih hnuah Serie A kawtkaia Milan hawi champ lurh reng chu phehtlukpui bawkin Serie A title a lakpui.
Game 200-a goal 115 leh assist tum 54 a siam hnuah Baggio khan Stadio delle Alpi a chhuahsan a, statistics piahlamah Turin khaw club tana 1993 Ballon d’Or winner contribution kha chhut fe tham a tling.
3. Ruud Gullit – PSV to AC Milan 1987 (£6m)
Baggio chung chiaha world record transfer fuh kan hmuh chu Ruud Gullit kha niin, Silvio Berlusconi all-star team buk tirit zual tura San Siro a vaklut kha a hun laiin a boruak a te thei lo!
Milan a thlen hnu lawkah player daihzai, ‘total footballer’ an tih mai hian Rossoneri chu thangkhat lian zet an chawi phak tawh loh Scudetto (Serie A title) a lakpui nghal vat a, Ballon d’Or a dawng bawk.
Kum 1989 a herchhuah meuh chuan Milan-in kum 20 an nghah tawh European Cup a lakpui leh a; khatih lai khan Dutch player ropui pathumin San Siro club ropui kha an bel a, kha mi kum European Cup final-ah khan amah, Gullit bakah a chipui dang Marco van Basten pawhin goal hnih a khung a, a kumleh nipui laiin an title kawl lai a humhimpui leh ngat a ni.
He all-rounder thawhhlawk zet hian Europe hlawhtlinna an chan lai vel khan a khup a sawisel a, hliam bakah Italian football-ah foreign player inlan theih zat boruak a awm chhoh tak bawk avangin 1993 Champions League final a khel lo a, a hnuah Sampdoria kaltlangin Serie A a chhuahsan ta hial a, Chelsea lamin an chang zui ta a ni.
Ruud Gullit hian AC Milan tan khan game 56-ah goal 171 thun tlingin, San Siro-a a cham chhung khan European Cup leh Serie A title pahnih ve ve a lakpui bakah Ballon d’Or a dawng hman a, world record fee-a lei fuh pathumna nih a phu!
2. Diego Maradona
Barcelona to Napoli 1984 (£5m)
Nou Camp-ah khan vul hman bawk tho mah se zan lam party tih vel a tuipui lutuk avang leh Athletic Club player-te nen an inbakkaih avanga thla thum hrem a tawh bawk avangin Diego Maradona hralh chhuak turin Barca thuneitu lawkte khan thutlukna an puitlin ta mai a ni!
Naples khuaah chuan le, Napoli fans lawm hlawh kumkhua tawh turin a inlan a; world record pound 5m kha pekbelh an duh hial ang tih tur khawpin kha khawpui kha Maradona fakna riin a khat a tih theih ang!
Maradona ho ngei mai khan Napoli chuan an club chanchina a vawi khatna atan Scudetto an hlawhchhuak ta mai a! Kum thum hnuah a dang an hlawhchhuak leh!
Heti chin hi Napoli fans-in an hriat reng tawhna tur chhan a la ni lo cheu! Uefa Cup leh Coppa Italia a lakpui leh!
Italy rama hming a chher fe tawh hnuah kum 1986 khan mimala a thawhhlawk vang liau liauin Argentina kutah World Cup trophy a lut a; amah Argentine daih ni mah se Neapolitans chuan chhuang takin Maradona kha an ‘ta’ a nih thu an puang riap mai!
He khawpui hian a atchilh satliah a ni mai lo a, pathian anga betu hial an awm – tun thlengin!
Napoli stadium hmingah Maradona hming an hmang a; kawtthler tinah a hming leh sulhnu lan theihna a la awm chiai chuai reng!
Diego Maradona hian Napoli-a season sarih a hman chhung khan Serie A title pahnih bakah Coppa Italia leh Uefa Cup pakhat ve ve a lakpui hman.
1. Cristiano Ronaldo
Manchester United to Real Madrid 2009 (£80m)
Number one luahtu Portugal captain hian Santiago Bernabeu-a a season khatnaah khan game 35 atangin goal 33 tehreng a khung tling hman a; season kua a hman zawh meuh chuan match 438-ah goal 450 zet a thunsak hman a, Spanish giants kha an va inseng sual lo tak em!
Portugal legend khan Real thuam inbel chungin Champions League title pali lakpuiin, Ballons d’Or pali a dawng hman bawk.
Santiago Bernabeu club khan chhawr viau mah se kum 33 mi ni tawh chunga kum 2018-a Juventus hnena an hralhchhuah khan pound maktaduai 13 lai an la hlep thei!