Tun season grass-a Osaka chak vawikhatna

Tun season grass-a Osaka chak vawikhatna
Four-time Grand Slam winner Naomi Osaka chuan Thawhtanni khan ace tum 16 zet hlap chhuak chungin Bad Homburg Open bul a tanna inkhelah 7-6(6), 7-6(4)-in Serbian qualifier Olga Danilovic a hneh a, tun season grass chung inelnaa a chak vawikhatna a ni.
Wimbledon atana inbuatsaihna tournament lian hnuhnung kal mekah kum 27-a upa Japanese player hian round of 16 lamah nizan khan fifth-seed Emma Navarro a hmachhawn zui leh a, result tarlan hman a ni lo.
Germany ram Bad Homburg khaw outdoor grass court hrang hranga women’s professional tennis tournament a hmachhawn hma hian a tournament khelh hnuhnung pahnihah Oska hian first round a paltlang zo lo ve ve a, a tlak hmanate chu French Open leh Berlin Open niin, fa a hrin avanga kum hnih dawn a chawlh hnua a title hmasaber chu kumin May thla khan sualchhuak bawk mah se thisen a pal hma kha a la pha tak tak zo lo!
Kumin January thlaa hliam avanga Australian Open third round khelh laia inhnukdawk Osaka hi May thlaa Italian Open title a lak hnu khan he thu buatsaih lai thleng hian eng leilungah mah a chak zawn leh thei ta lo vang vang a, nizanah a chak a nih chuan a zawna tum hnih a chak leh hmasakber tum a ni ang.
WTA ranking lama 56-na a luah mek Osaka chuan Thawhtannia a hnehna sualchhuah chungchang sawiin, “Tun hi kumina grasscourt match hnehna ka chan vawikhatna a nih avangin ka phur takzet a, he hmuna ka inkhel thei hrim hrim leh round sang zawk ka kai chho hi ka hlim em em a ni,” a ti.
Thawhtanni inkhel dangah Russian eighth-seed Ekaterina Alexandrova pawh last 16 lut zawngin a chak a, 6-1, 6-2-in Swiss Belinda Bencic a hneh.
Croatia star Donna Vekic chuan sixth seed southpaw Diana Shnaider lakah 6-3, 6-3 hnehna nuamsa changin, Clara Tauson of Denmark erawh 6-7(6), 6-3, 6-3-a Poland nula Magdalena Frech paltlang turin a thawhrim a ngai thung.
Wimbledon inbuatsaihna dang Eastbourne lamah pawh Brazilian rawlthar Joao Fonseca chuan a grass-court hnehna hmasaber hlawhchhuak ve bawkin, second round a luhna kawngah 6-7(8), 6-0, 6-3-in Zizou Bergs a hlap chhuak.
South American kum 18 mi Fonseca hi qualifier niin, kumin kumtir Australian Open first round-a world number nine Andrey Rublev a hneh kha a career-a a hnehna sualchhuah hraw ber a la ni a, defending champion Taylor Fritz laka hnehna a chang leh a nih chuan chu pawh chu chakna lian tham zinga chhiar tel a ni leh ang.
Hmeichhe lamah New Zealand player kum 24 mi Lulu Sun chuan rin loh takin defending champion leh top seed ni nghal Daria Kasatkina lakah 7-5, 2-6, 6-3 hnehna sual chhuakin, Russian thisena piang, Australian ni ta Kasatkina tan title beisei tur a awm ta lo!
Mallorca Open lamah pawh Thawhtanni tho khan opening-round contest-ah inbarakhaihna liantham hmuh tur awmin, Russian Roman Safiullin chuan French fifth seed Alexandre Muller lakah 7-6(5) 7-5 hnehna a chang a; inkhel dangah Corentin Moutet chuan 4-6 6-3-a tualchhung tlangval beiseiawm Pedro Martinez barakhaih chungin round of 16 a lut ve bawk.
Safiullin hian 6-0 6-4-a American Nishesh Basavaredd paltlang Serbia mi Hamad Medjedovic a tum leh a; Muller-a chipui Moutet chuan German eighth seed Daniel Altmaier a hmachhawn ve bawk.