Tunah ka tih theih tawk a tlem
Sawrkar chakna hman ka tum
– Vanlalsailova
Dampa bial tan tunah chuan a tih theih tawk a tlem a, sawrkar chakna hmangin bial chhung khaw hrang hrang hmasawnna thlentir a tum tih Dampa bial by election-a ZPM candidate tur Vanlalsailova chuan a sawi.
Zirtawpnia an party office-a inkhawmah ZPM candidate Vanlalsailova hian Dampa bialtu MLA boral ta in a lo beisei, a taka a hmuh tak loh thlentir turin, ZPM ministry-ah Dampa bial-in ruling MLA a neih ngei theihnan party sawi loa an bial tan tanrual a tul tih a sawi.
Mamit district chu aspirational district-a puan a ni a. Hmasawnna mamawh bik district, a bik taka ngaihtuah ngai district a ni, tiin, “MLA bial pathum zingah pawh Dampa hi hmasawnnain a kal kan, bial hnufual, hmasawnna lian hmuh tur awm lohna bial a ni reng mai hi Dampa mipui rualawh a na a. MNF sawrkar liamtaah khan kan beisei ang hmasawnna kan hmu lo hle,” a ti.
Bialtu MLA boral ta Pu Rintluanga khan Assembly House-ah an bial tan auchhuak nasa mah se, MNF sawrkara minister-ten an ngaihsak tawk lo kha an vuipui ve hle tih a sawi.
“Politics-a ka luh hma hian, ka phak tawk tlem mah se, Dampa bial tan ka ngaihtuahna ka seng nasa a, sum leh pai pawh ka remchan angte he bial tan ka lo thawh ve tawh. Mite anga thla tin hlawh la emaw sumdawnna lian tak nei emaw ka ni lo a, ka tih theih tawk a tlem hle. Chuvang chuan sawrkar chakna hmanga khaw hrang hranga hmasawnna thlen hi ka tum ber a ni,” Vanlalsailova hian a ti.
Forest Conservation Amendment Act 2023 chu lo insawithaih pawl pawh an awm a, opposition party an phusa hle tih ZPM candidate hian a sawi. “A that leh that loh chu ZPM sawrkar chhung hian kan hre mai ang,” a ti.
Tunah ka tih theih tawk a tlem Sawrkar chakna hman ka tum – Vanlalsailova
