Typhoon Bualoi-in Vietnam nuai, mi pakhat thi

Typhoon Bualoi-in Vietnam nuai, mi pakhat thi
Typhoon Bualoi chuan tuipui atangin Thawhtanni zing khaw var hma khan Vietnam hmar lam laili a lut a, chenna in tam tak tichhiain power grid a tichhia a, hriat theih chinah mi pakhat thi awmin sangha mantu mi 12 an chin hriat a ni lo bawk.
Typhoon hian zing dar 08:00 (India-a zing dar 06:30) velah Nghe An province lutin darkar khata km 117 vela chak thlipui nena thawk chu darkar pawh tling lo hnuah km 88 vela chak thlipuiah a tla thla niin an ram weather forecast agency chuan a sawi.
Khawmual a luh hma hian Bualoi hi darkar eng emaw zat chhung an ram tuipui kam hrul velah a awm a, tui fawn nasa taka siamin hmun thenkhatah chuan metre riat laia sang niin weather agency chuan a sawi.
Thi pakhat awm hi Hue khawpuia tui lianin a lak a ni a, sangha mantu mi 12-te hi Quang Tri province-a an lawng nen tui fawn phul nasa takin a lak nia hriat an ni tih sorkar thuchhuahin a tar lang.
Typhoon-in khawmual a kai hma hian sorkar chuan mi 28,500 chuang hmun himah sawn an ni a, an ram lailia province eng emaw zatah thlawhna za tel an thlawh chhuah hun tihkhawtlai leh zin tur thulhtir an ni.
Inrinni atang khan Bualoi thawk tur avang hian Vietnam hmun tam takah ruah tam tak a sur tan tawh a, tui lian leh lei min a awm hlauhna a awm mek.
Pathianni zan atanga Thawhlehni thleng khan ruah sur tura sawi lawk la niin an ram hmun thenkhatah phei chuan mm 500 sur tling ngei turah an ngai tih weather agency chuan a sawi.
South China Sea nena inepa awm, Vietnam hi typhoon thawh duhna hmun a ni a, Bualoi pawh hi Philippines khawchhak lama insiam a ni a, mi 10 vel thi an lo awm tawh a ni.