Thawhleh zan khan UEFA Champions League 2024-25 khelh chhunzawm a ni a. An khelh hmasaka hnehna chang zo lo ve ve Arsenal leh Manchester City in hnehna an chang. Arsenal hian an mikhual Paris St-Germain an hneh a, City in Mimuala an khingpui Slovan Bratislava chu awlsam takin an hneh ve bawk.
Arsenal 2-0 PSG
London club lian Arsenal chuan Emirates Stadium-ah French champion Paris St-Germain an mikhual a, an mualah fiahna hautak an hmachhawn. French champion PSG lakah mit la takin an inlan a, si hnih faiin hnehna an chang. An khelh hmasak berah Atalanta hneh zo lo mah se team lian PSG hnehin Gunners hian point thum an hmu ta nge nge.
Arsenal hian an mualah bul an tan tha a, hma takah goal an thun teuh hle. Fuh taka an khingpui te an nawr tlang hnuin Bukayo Saka chuan goal thun theihna hun tha a nei a. Gunners leh England player pawimawh Saka hian a pet sang hret a, a hun tha neih chu uiawm takin a hlah.
An hun tha neih hmasak hloh bawk mah se Gunners hian goal an thun ta thuai tho thung. Leandro Trossard ball vawrh luh tha tak chu Kai Havertz chuan minute 20-naah a tauh goal a, hmahruaina goal a thun. Arsenal hmahruaina goal thun turin Havertz fak loh rual a ni lo va, chuti chung chuan PSG si nghak Gianluigi Donnarumma chet ran tawk loh a puh ve theih tho thung.
Hmahruaina goal an thun hnuin Arsenal an khel tha zui viau a, an mikhual PSG te hian hlauhawm siam tur khawpin an nawr thei meuh lo. Hmuhnawm taka inlan Gunners hian chawlhlawk hmain goal an thun belh leh ta nge nge. Minute 35-naah Bukayo Saka chuan mawi, fing leh vanneihthlak ang reng takin free-kick a chhuih goal. Ding lam sir atanga Saka pet luh hi Arsenal player intlanthleh fuh takin an dek lo vek a, PSG si nghak Donnarumma rin loh takin goal ah a lut a, Arsenal in an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Arsenal in goal an thun belh theuh hle. Hmahruaina goal thuntu Havertz chuan tauh luh theihna hun tha nei bawk mah se a tauh na tawk lova, si nghak Donnarumma tan dan a har thei tawh lo. An hun tha an hlah hnuin hun tawp dawn hnaiah Arsenal hian goal thun theihna hun tha an nei zui leh. Gabriel Martinelli chuan hnai tak atangin pet bawk mah se si nghak Donnarumma chuan fuh takin a lo dansak a, an team a chhan him. Martinelli-a’n uiawm taka goal thun theihna hun tha a hlah hnu hian thil lian tham thleng a awm tawh lova, Arsenal chuan an mualah 2-0 in hnehna an chang a, point thum an hmu ta a ni.
An mualah PSG an hneh tum hian Arsenal midfielder thar Mikel Merino chuan a club thar tan a vawi khat nan a khel. Hliam vanga a club thar tan inlan thei lo reng Merino hian PSG lakah bul tan lo mah se minute 64-naah Thomas Partey a thlak a, mual chhung a lut. A club thar Arsenal tan a khel chhe lem lo viau nghe nghe a. Odegaard nen an inkawp hmuh a chakawm tawh hle. Captain Martin Odegaard hi hliam vangin a chawl mek thung.
Foden a kir, goal a thun
Thawhleh zana inkhel dangah EPL team lian Manchester City chu Národny Futbalovy Stadión-ah Slovia champion Slovan Bratislava hmachhawn turin an leng lut a, mikhual an nihna hmunah 4-0 in hnehna an chang. Slovan Bratislava an hmachhawn tum hian Phil Foden chuan bul a tan a, bul a tan lehna inkhelah goal a thun a, a khel tha viau nghe nghe.
Champion tura rinkai Manchester City hian Mimualah bul an tan tha viau a, goal an thun hma hle. Inkhel tan atanga minute riatna lekah Barcelona atanga kir leh Ilkay Gündogan chuan hmahruaina goal a thun.
Hmahruaina goal an thun hnuin Pep Guardiola team te an khel tha zui viau a, goal pawh an thun belh leh thuai. Fuh taka an khingpuite an nawr tlang hnuin Phil Foden chuan lei hrulah fuh takin a pet goal a, minute 15-naah City goal hnihna a thun.
Season liam taah Mancheser City leh England tana khel tha tak, EPL a chawimawina sang pathum dawng kawp thei Foden hian season tharah mak tak maiin City ah hmun pawimawh a chang phak lo teh tlat a, a hun tam zawk chu bench-ah a hmang rih. Slovan Bratislava an hmachhawn hma hian manager Pep Guardiola chuan Foden-a’n bul a tan tur thu leh tha zawka a kir tur thu a sawi a, sawi lawk ang ngeia khel thain Foden hian goal a thun a. EPL lamah pawh City tan bul a tan chhunzawm thei tura ngaih a ni. Foden goal thun hnu hian goal dang luh belh lovin first half a zo va, 2-0 a hmahruai chungin City in chawlhlawk an hmang.
Chawlhlawk hnu lamah City an khel tha chhunzawm a, goal hnih an thun belh leh. Second half tan tirh lamah City midfielder Rico Williams chuan Erling Braut Haaland tan fuh zetin ball a chhawpsak. Haaland hian fuh zetin a khalh tlang a, si nghak a bum tlang hnuin awlsam takin a pet goal a, minute 57-naah an goal thumna a thun.
Si thum faia hma hruai tawh City an inthlahdah mai lova an khel tha chhunzawm zel. Hun tawp dawn hnaih lam minute 74-naah James McAtee chuan Phil Foden siamsak atangin an goa lina a thun a, an chakna a nem nghet.
Mimualah si li fai ngawta an chak vangi City hian khelh hnih atangin point li an hmu a, goal difference-ah +4 ni bawk in, palinaah an inhlangkai. UCL kal phung tharah group a inthen a awm tawh lova, team 36 te an inkhel chhuak vek dawn. Vawi hnih theuh an inkhelh chhuah hnua point hmusang zual pariatin direct in last 16 an lut nghal dawn a, team 16 dangin playoff an khel zui leh dawn. He dan thar hian team tha a tifiah zual tura ngaih a ni.
UCL 2024/25 – Arsenal leh City an chak
