January 29, Nilai zan khan UEFA Champions League (UCL) 2024-25 League round khelh zawh a ni a. Dinhmun derthwng taka ding Manchester City chuan an mikhual Club Brugge an lehthal a, play-off khel turin an tling hram. Manchester City rual hian Real Madrid, Paris Saint-Germain leh Bayern Munich te pawh last 16 play-off khel turin an tling ve bawk.
City an thochhuak
Season kal mek inelna hrang hranga beisei phak lo Manchester City hian play-off khel phak turin an match hnuhnung berah chak ngei ngei an ngai. An mualah an chak zo lo a nih vaih chuan play-off em pawh khel phak lovin an tla thum dawt dawn. EPL champion ni chunga Knockout phase play-off tak ngial pawh an khel phak lo a nih chuan an tan mualphona vawr tawp a tling thei hial dawn bawk. An muala fiahna hautak zet mai an hmachhawn tumin goal an chhuah hmasa naa 3-1 a hnehna chang letin an thochhuak a, play-off khel turin an tling thei hram.
City hian an mikhual lakah bul an tan tha lova, goal chhuah hmasa zawkah an tang. Belgian club lian Club Bruge tan hian Raphael Onyedika chuan chawlhlawk dawn hnaih minute 45-naah hmahruaina goal a thun a. Si khat faia hmahruai chungin chawlhlawk an hmang.
Chak mamawh City hian chawlhlawk an hmang tangkai a, second half-ah goal an thun thuai. Minute 53-naah Mateo Kovacic chuan goal thunin an si phurh a sut. 1-1 a nih hnuin City an khel tha chhunzawm a, an vannei leh thuai. Minute 62-naah mikhual player Joel Ordóñez chuan an lamah ti-goal palhin City hmahruai letna goal a thunsak. An mualah hma an hruai hnuin Pep Guardiola team ten inrintawkna sang zawk an nei thar a. Ngam taka an mikhualte an nawr rah an seng a, Savinho chuan minute 77-naah an goal thumna a thun a, an chakna a nem nghet. Savinho goal thun hnu hian goal dang a luh belh thei tawh lo va, City chuan an mualah hnehna hlu tak an chang zui ta a ni.
An mualah an chak vangin City hian khelh 8 atangin point 11 an hmu tling chiah a, 22-na ni chunga League round kharin last 16 play-off khel turin an tling. City in an lehthal tak Club Brugge hian khelh 8 atangin point 11 tho an hmu a. 24-na an ni a, play-off khel turin an tling ve hram bawk.
Play-off khelh ngai Real Madrid
Nilai zana inkhel dangah champion lai Real Madrid chuan mikhual an nihna hmunah 3-0 ngawtin mualneitu Brest an hneh. An match hnuhnung berah chak chiang viau mah se Real Madrid hi last 16 khel turin an tling chiang nghal bik lo thung a. Manchester City ang thoin play-off an khelh a ngai dawn. Real Madrid leh City hi play-off a intum thei dinhmunah an ding mek bawk.
Champion lai Real Madrid tan hian Rodrygo chuan goal hnih a thun a. England midfielder Jude Bellingham chuan goal khat a thun bawk. Los Blancos hian khelh 8 atangin point 15 an hmu a, 11-na ni chungin league round an khar. An mualah si thum fai ngawta tlawm Brest pawh hian play-off an khel phak ve dawn bawk.
Play-off khel tur PSG leh Bayern
EPL champion Manchester City leh La Liga champion Real Madrid te last 16 khel tura an tlin nghal theih loh rualin French Ligue 1 champion Paris St-Germain leh German club lian Bayern Munich te pawh last 16 khel turin an tling chiang nghal bik lova, play-off an khelh a ngai dawn.
PSG hian League round-a an match hnuhnung berah VfB Stuttgart an hmachhawn 4-1 in hnehna an chang. PSG tan hian Ousmane Dembélé chuan hattrick a siam a, Bradley Barcola chuan goal khat a thun ve bawk. PSG hi 15-na ni chungin an tlang.
Nilai zan vek hian 3-1 a Slovan Bratislava hnehtu Bayern Munich pawh play-off khel turin an tlang ve bawk.
UCL a inlan zui tur Manchester City
