UCL League round tawp zan

Zanin zan laiah UEFA Champions League, League round hnuhnung ber khelh zawh a ni dawn a. Direct a last 16 lut tur, play-off khel zui tur leh tla tur zawng zwng tihchianin a awm dawn. Inkhel 18 ngawt a awm dawn a, footballngainatute tan men rei a inchhirawm lo ang.
Tunge Arsenal hnung zui ang?
Champions League season kal mekah vawi 7 chak zawn thei awmchhun Arsenal in last 16 an lut chiang tawh a. Arsenal lakah chiah la tlawm Bayern Munich in last 16 an lut chiang tawh bawk. Table chung ber luahtu Arsenal hian table chung ber an luah chiang tawh. Nilai zana an khingpui Kairat Almaty lakah tlawmin, Bayern Munich in an khingpui PSV Eindhoven hneh pawh ni se head to head-ah Arsenal an chungnung zawk tho tho a, League round-ah champion an ni chiang tawh.
Bayern Munich : German champion Bayern Munich hian PSV an draw a nih chuan table-ah pahnihna an ni chiang nghal dawn a. PSV mualah an tlawm a nih erawh chuan Real Madrid leh Liverpool ten an la umphak thei thung.
Real Madrid : UCL a champion ngun ber Real Madrid hian Benfica an hmachhawn dawn a. Mikhual an nihna hmunah an tlawm khut a nih chuan lehpel thei dinhmuna ding an awm nual vangin direct a last 16 lut phak lo thut thei dinhmunah an ding. Benfica hneh an mamawh hle. Chak tumin thapui an thawh ang.
Liverpool : Real Madrid ang thoin Liverpool pawhin point 15 an hmu ve mek a, an mikhual FK Qarabag an hneh a nih chuan point 18 an hmu ang a, direct in last 16 an lut ngei dawn. An mualah an chak zo lo a nih erawh chuan an tawlh hniiam dawrh theih thung.
Tottenham : Panganaa awm mek Tottenham in German club Eintrach Frankfurt an hmachhawn dawn a, mikhualah chak an mamawh viau. Mikhual an nihna hmunah an tlawm a nih chuan 15-naa awm mek Juventus pawhin an lehpel daih thei dawn a. Mikhual an nihna hmunah chak ngei tumin tan an khawh nasa hle ngei ang.
PSG vs Newcastle United: Champion lai Paris St Germain in Newcastle United an mikhual tur hi inkhel ngaihven hlawh ber zingah a tel ang.
Champion lai PSG hi point 13 hmuin paruknaah an awm mek a, an mikhual tur Newcastle hian point 13 bawk an hmu a, pasarihna an luah ve thung. An inkhela chak zawk zawk hian direct in last 16 an lut thei dawn a, a chak lo zawk zawk chuan play-off an khelh zui a ngaih hmel ve thung.
Chelsea : Pariatnaa awm mek Chelsea in fiahna hautak an hmachhawn dawn a, Italian champion Napoli chu an tualzawlah an luh khung a ngai dawn. Mikhual an nihna hmunah an chak zo lo a nih chuan Chelsea hian direct in last 16 an khelh phak a rinawm loh. Manager thar Rosenior hnuaiah Blues hian harhtharna an chang mek a. Napoli hneh turin inrintawkna sang zawk an nei ang. EPL-ah chetthat an tum vangin direct a last 16 khelh phak an tan a pawimawh leh zual ang.
Chelsea an mikhual tur hi thih leh dam inkara leng Napoli tan fiahna hautak leh zual a ni. Napoli hian khelh 7 atangin point 8 chauh an la hmu a, 25-naah an awm mek. An mikhual Chelsea an hneh zo lo a nih chuan play-off em pawh khel phak lovin an tla hang nalh dawn a. An mualah chak hlauh a nih erawh chuan play-off an khelh phak a rinawm thung. Napoli hi Pathianni zan khan Juventus lakah 3-0 ngawtin an tlawm a, an boruak hniam lai tak a ni.
FC Barcelona : Spanish La Liga champion FC Barcelona hian khelh 7 atanga point 13 hmuin pakuana an luah mek. Nou Camp-a an mikhual F.C. København hneh ngei an mamawh a, an chak a nih pawhin team dang result-ah an inngah a ngai dawn. An mikhual tur F.C. København hian hnehna an chang hlauh a nih chuan play-off an la khel ve thut thei bawk.
Manchester City: 11-na luah mektu Manchester City hian Galatasaray an mikhual dawn a, an mualah an chak a nih chuan team dang result a zirin direct a last 16 lut thei dinhmunah an ding ang. Play-off khel phak turin Galatasaray hian City lakah chak an mamawh ve bawk.