Uganda ramah Tek tlain naupang sawm chuang deng hlum
Uganda rama raltlanna awmna camp-ah tek tlain, naupang 13 leh puitling pakhatin an thih phah niin thuneituten an sawi.
He thil thlen hun hi zirtawpni kha nia sawi a ni a, a tam zawkte chu an inkhawm lai niin, mi 34 in hliam an tawrh phah niin sawi a ni bawk.
He chhiatna hi an ram hmarchhak lam, Palabek refugee camp-ah niin, tunhnaiah ruah a sur nasa hle a, hei hian tek tla pawh a titam hle niin Uganda ram thupuangtu chuan a sawi.
Naupang thite hi an kum zat tak tarlan a ni lo a, heng raltlante hi a tam zawk chu an thenawm South Sudan atanga tlan lut an ni.
Uganda ram hian tek tla hi an lo tuar nasa tawh hle a, kum li kalta pawh khan an ram hmarchhak lama awm Arua khawpuiah tek tla in a den avang hian naupang 10 an lo boral tawh a, heng naupangte hi an football khelh lai a ni nghe nghe.
Uganda ramah Tek tlain naupang sawm chuang deng hlum
