Guinness World Record chuan khawvela ui upa ber Bobi chuan kum 31 a tling tih an puang. Bobi hi Rafeiro do Alentejo purebred a ni a. Inrinni kalta khan a kum 31 tlin champha hi a chenna Portuguese thingtlang khua Conqueiros-ah an lawm a, mi 100 sawm khawmin, a neitupa Leonel Costa chuan ruai a theh sak a ni.
A pianchampha lawmna khualtha mi 100 rual te chu sa chi hrang hrang an chhawp sak a, Bobi pawh hi mihring ei ang tho ei ve a ni a, a neitupa hian a ei ang ang a pe mai thin niin a sawi. A pianchampha lawm nan hian lamthiam rual te pawh an sawm tel a ni.
Costa hian ui upa deuh deuh a nei thei riau mai a, Bobi nu, Gira pawh kum 18 a dam a, mahse, Costa chuan a ui vulh te chu kum 30 thleng thlenga an dam theih a rin ngai bik loh thu a sawi. Bobi damreina chhan ni a ngaih chu an duat a, a duh dan danin an awm tir a, an thlun ngai loh vang a nih a rin thu a sawi bawk.
Tunah chuan Bobi pawh a che chhuak tha peih vak tawh bik lo, a mit khawhmuh a fiah vak tawh lo va, chuvangin inah a tawm deuh chawt tawh a, ei leh mut chu a nitin awmdan a ni deuh tawh mai. Bobi pian ni hi Servico Medico-Veterinario do Municipio de Leira (Veterinary Medical Service of the Municipality of Leiria)-in an finfiah a, Bobi hi 1992-ah a ziah luh a lo ni vang tawh. A kum pawh hi Portuguese sorkar-in a pawm, SNMV (Sindicato Nacional dos Médicos Veterinários; National Union of Veterinarians) enkawl pet database SIAC-in an finfiah a ni bawk.
American Veterinary Medical Association chuan ui hi an than chak dan atanga chhutin mihring kum nen an upa dan hetiang hian a chhut dan an siam a, ui lian pangngai hi kum khat an tlin chuan an upat lam hi mihring kum 15 mi ang vel a ni a, an kum hnihnaah chuan mihring kum 24 ang vel niin, chumi hnuah chuan mihring tana kum khat-ah ui tan kum 5 zel belh tawh mai tur a ni.
Ui upa berin kum 31 a tling ta
