Black Sea-a Russian tuialhthei thlitfimna lian tak chu tun thla chhung khan a vawi thum nan Ukrainian drone-in a fuh a, ‘kangmei nasa tak’ a chhuak a, a bula chengte chu hmun himah sawnchhuah an ngai niin tual chhung thuneituten an sawi.
Chawlhkar hnih kalta chhunga Tuapse refinery-a beihna hmasaah chhiatna nasa tak thlengin tuipuiah tuialhthei a luh phah a, mi chengte chuan khawpuiah hian ruah ‘dum’ a sur a, hmun tinah tuialhthei a awm tih an sawi.
Kremlin chuan Ukraine chu ‘khawvel energy sumdawnnaa tuialhthei tlakchhamna tipung zual… leh boruak timuanawm lo zual zelah’ a puh.
Ukrainian sipaite chuan drone hmanga an beih thu hi an sawi a, tuialhthei thlitfimna hmunte hian kum 2022-a Russia-in an rama beihpui a thlaknaah sum a neih theih nan a pui niin an sawi.
Krasnodar region Governor Veniamin Kondratyev-a chuan Thawhlehni khan kang thelhtu 160 chuang tirh an nih thu leh thi leh hliam an awm loh thu a sawi.
Thawhlehni tuk khan Telegram-ah Kondratyev-a hian kang thelhtute leh chhanchhuaktu dangten dinhmun khirh tak karah hna an thawk tih a sawi a, an hmalakna chu ‘huaisenna dik tak’ a nih thu a sawi.
“Kan ngaih pawimawh ber chu khawpui mipui leh tlawhtute nunna leh hriselna hum a ni,” a ti.
Municipal district hotu, Sergei Boyko-a chuan a bula kawngpuiah chengte chu chhuak turin a ngen a, sikul pakhatah awm lailawkna tur (temporary evacuation center) siam a ni.
Hetihlai hian regional crisis center chuan ‘kangmei nasa tak avang hian boruakah combustion product tam tak a chhuak’ tiin mipuite chu hmai tuam tur leh hnar, mit leh hrawt tifai tha turin an chah a, tukverh khar tur leh pawn lama hun hmang tam lo turin an ngen bawk.
Moscow atangin Russian President Vladimir Putin-a chuan emergency minister chu Tuapse-ah thlawhtheihna hmanga kangmei ven leh faina hna thawhte enkawl turin a hriattir nghal.
Putin-a thupuangtu, Dmitry Peskov-a chuan Ukraine hian thawn chhuah atana ruahman tuialhthei dahkhawmna hmunte a bei niin a sawi a, Kyiv hian khawvel energy sumdawnna a tichhe mek niin a sawi.
Tun hnai thla eng emaw zat chhungin Ukrainian sipaite chuan Russia-a energy hmun pawimawh tak takte an bei nasa hle.
Kyiv chuan Russia chu indona chhunzawm zel phalsak an nih avangin tum bik an nei thu a sawi.
Russian drone-in Kyiv a kah fuhah mi pakhatin hliam a tuar niin Mayor Vitaliy Klitschko chuan a sawi ve bawk a. Thuneitute pawhin thlanmual pakhatah kangmei a chhuak tih an sawi bawk.
Ukraine-in Black Sea-a Russian tuialhthei thlitfimna kap
