Ukraine-in drone hmanga Inrinni zan zankhuaah Moscow region an beihnaah mi pahnih thiin paruk dangin hliam an tuar niin Governor Andrei Vorobyev-a’n a sawi.
Vorobyev-a hian drone 249 an kah thlak thu leh chenna in tam tak kang a awm thu a sawi a, kudam a kang bawk tih a sawi a. Moscow-ah chuan tuialhthei thlitfimna a chhia a, tumhmun pahnihah thlawhna thlawk tihdanglam a ni bawk.
A hmain Ukrainian thuneitu chuan Inrinnia Russian-ten Kyiv leh Sumy region an beihnaah naupang pahnih telin mi pasarih an thi tih a sawi ve bawk.
Russia leh Ukraine hi tun hnaiah an inbei nasa hle a, energy siamna leh inkalpawhna hmanrua bakah sipai thil an inkahsak nasa.
Pathianni khan Telegram-ah Vorobyev-a chuan Sofyino-ah hmeichhia kum 44 mi chu drone-in an chenna in chhawng thuma sang a fuhah a thi tih a tar lang a. Naupang pahnih telin mi pangain hliam an tuar bawk tih a sawi.
Orekhovo-Zuevo district-ah a chenna in drone-in a fuhah putar a thi bawk tih governor hian a sawi.
Social media-a video darhah chuan Inrinni zan khan Moscow region chungah thil puak êng hmuh tur leh kudam kang hmuh tur a awm.
Hetih lai hian Moscow Mayor Sergei Sobyanin-a chuan drone-in khawpuia intihhlimna hmun bul lawk in a fuh a, tuialhthei thlitfimna hmun a chhe bawk tih a sawi.
A hma lawkin Moscow pana thlawp drone 152 an lo kah thlak thu a sawi bawk.
Moscow-a thlawhna tumhmun lian ber, Sheremetyevo-ah chuan passenger-te chu ‘khuahkhirhna lailawk’ hnuaiah awmtir an ni a, khawpui thova Vnukovo airport-ah pawh thleng thar leh chhuak tur zawng zawng tihtawp lailawk a ni bawk.
Ukraine-ah pawh Inrinnia Russian-ten Kyiv region-a Fastiv khawpui an beihnaah nu, a fate mipa leh hmeichhe naupang nen an thi tih region head Tymur Tkachenko-a’n a sawi.
In eng emaw zat chhia a awm bawk tih a sawi.
Hmarchhaka Sumy region-ah Russian drone-in car tlan lai a fuhah mi pali an thi bawk niin tual chhung thuneitu, Oleh Hryhorov-a’n a sawi.
Russian President Vladimir Putin-a chuan Ukraine hi February, 2022 atang khan a rûn tan a ni.
Ukraine-in Moscow a kahnaah mi pahnih thi
