Ukraine-in Russia run zui zel

Ukraine chuan Russia Kursk region a luhthuk zel laiin lei pawimawh tak pahnihna chu a tihchhiat vek thu a puang a.
Ukrainian military te chuan Xvannoe a Syem River kalkaina lei pawimawh tak an tihchhiat lai thlalak hi an tichhuak a ni.
A hnu lawkah Ukrainian President Volosymyr Zelensky chuan a tum khat nan Kursk region an luhchuahna chhan chu Russian attack laka ‘buffer zone’ siam nana an tih a nih thu a sawi.
Ukraine chuan kum 2022 a Russia in Ukraine a run hnu atanga Russian territory a luhthuk ber a tawng mek a.
“Lei pakhat a chim leh ta” tia sawiin Ukrainian Air Force commander Lt Gen Mykola Leschuk chuan social media-ah lei tihchhiat lai thlalak a tichhuak a ni.
Gen Oleschuk chuan, “Ukrainian Air Force aviation te chuan hmelmate logistical capabilities te chu airstrike hmangin an tichhe zel a, chu chuan harsatna namen lo a siam a ni,” tiin a sawi a.
Kar kalta khan Ukraine chuan river Seym chunga dawh kai tho lei Glushkovo khua bula mi chu a lo tichhe tawh bawk a. He lei hi Kremlin-in sipaite chaklak nan ber a hman a ni.
Ukrainian sipai tena Russia ram thuk tak an luh atanga karhnih a liam meuh chuan chamchilh an tumzia lang tawhin President Zelensky chuan a sipai te chuan Kursk-ah inbun nghet zelin Russia ram chhung an lut thuk zel dawn tiin a sawi.
Pathianni khan thusawina a neihah, “Kursk region-a kan operation chuan Russian army leh Russian state-ah mai bakah an defence indusry leh economy ah hloh nasa tak a siam a ni,” tiin a sawi.
Zelensky chuan an chetlakna chu ‘Ukraine venhimna mai a ni lo’ tia sawiin an tum ber chu ‘Russia war potential a nasa thei ang bera tihchhiatsak leh a na thei ang bera chhanlet a ni’ tiin a sawi a. Chung zingah chuan Russia ram chhung ngeia Ukraine a duhthala a beih theih loh nana buffer zone siam a ni a ti bawk.
President Zelensky adviser Mykhaylo Podolyak chuan Ukraine chuan Russia ram awp a duh lo, mahse, inbiakna a awm theih nana hmalakna a ni a ti a.
Chutih laiin Moscow chuan Ukraine chetlak dan chu inrunluihna turu tia sawiin chhanlet ngei a nih tur thu a puang zui a.
Ukraine tena western Russian territory an lak laiin Russian sipai te chuan Ukraine khawchhak lamah ram la ve mek thungin tun hnaiah khua eng emaw zah an thuhnuaiah an dah ve thung a.
Hetih lai hian UN nuclear watchdog te chuan Russian awp mek Ukraine a Zaporizzhzhia power plant chu a bul lawkah drone a tlak avangin dinhmun derthawng takah a awm an ti.
Rafael Grossi, head of the International Atomic Energy Agency (IAEA) chuan Zapozrizhzhia chu an ngaihven takzet thu sawiin ram pahnih te chu engti kawng pawha nuclear plant chu humhim turin a ngen a ni.