Ukraine-in St Petersburg-a oil terminal a kap

Russia khawpui pahnihna, hmarthlang lama St Petersburg-a oil terminal lian tak chu Ukraine-in a kap niin President Volodymyr Zelensky-a’n a sawi.
‘Russia-in indona atana sum a lak luhna hmunhma’ pawimawh tak a nih thu a sawi a. Ukraine chuan he biala Russia naval base lian tak a kap niin a sawi bawk.
St Petersburg Governor Aleksandr Beglov-a chuan khawpui chu drone hmanga beih a nih thu sawiin oil terminal kah a nih thu pawh a pawm a. Thi leh hliam an awm lo tih a sawi.
Ukraine hian tun hnai khan Russia-a energy hmun pawimawh tak chu long-range drone hmangin a bei thar nasa a, hei vang hian tuialhthei indaih lohna pawh a awm phah a. Kyiv chuan Russia-in tuialhthei a thlitfim theih thin 43% vel chu ‘che thei lovin a awm’ tih a sawi.
Ukraine hian Russian tuialhthei leh boruakalhthei hmunhmate hi dan anga bitum a nih thu a sawi a, Moscow hi indona chhunzawm zel turin heng a thawn chhuahah hian a innghat nasa niin a sawi.
Ukraine-in a beih avanga tuialhthei an tlachham tih pawm tha duh lo tak, Russian President Vladimir Putin-a kar hmasa khan a lo sawi ve zauh tawh a, Inrinni khan ram chhunga hralh tur a tam theihna tur bill a ziak lut thar nghe nghe.
Putin-a hian February, 2022 atang khan Ukraine hi a bei nasa hle a ni.
Zelensky-a chuan Inrinni tuk khan St Petersburg leh a chhehvela hmunte kah chu Ukraine ramri atanga km 850 vela hla a nih thu a sawi.
Chhiatna thlen dan hi hriat kim a la ni lo va; mahse, Ukrainian president-in video a dah chhuahah chuan drone hi a tum lam panin a thlawk a, a fuh hnuah meikhu dum lian tak a chhuak a ni.
Ukrainian sipaite chuan terminal hi Russia-a terminal lian ber zinga mi niin an sawi a, kum khatah petroleum product ton maktaduai 12.5 siam chhuah theih a ni.
Sipai chuan Kronstadt-a Russian Baltic Fleet-a naval base pawimawh tak kahh a nih thu an sawi bawk a. Russia erawh chuan engmah a la sawi lo.
Governor Beglov-a chuan Ukrainian drone 72 chu St Petersburg leh Leningrad bial hmun zau takah kah thlak a ni tih a sawi.
Khawpuia chengte drone a hlauhawm chhung in chhunga awm turin a chah a. Mobile internet service pawh a buai thei tih a sawi.
St Petersburg-ah hian mi maktaduai nga chuang an cheng a ni.
Hetih lai hian Inrinni khan Ukrainian sipaite chuan khawchhak lam khawpui pawimawh, Kostyantynivka chu Russian thuneihna hnuaiah a awm tih sawi chu an hnial a. Sipai thupuangtu, Maj Andriy Kovalyov chuan, “Kostyantynivka hi Ukraine Defence Forces thununna hnuaiah a la awm a ni,” a ti.
Putin-a’n June thlaah Kostyantynivka hi an thuneihna hnuaiah a awm tan tih a sawi tukah lehlam hian an hnial a ni.
Kostyantynivka hi Donetsk region-a Ukraine ‘kulhpui’ siamtu khawpui eng emaw zat zinga mi a ni a, regioon hmun a tam zawk hi Russia-in a luah tawh a ni.