Ukraine indonaa North Korean sipai tel 40% vel thi leh hliam awm tawh

Ukraine indonaa North Korean sipai tel 40%
vel thi leh hliam awm tawh
Khawthlang ram thuneitute chuan North Korea-in Ukraine indona kal meka a tirh zinga 40% dawn chu thla thum lek chhungin Russia khawthlang lam Kursk region-ah thi leh hliam an tuar tawh niin an sawi.
North Korea hian sipai 11,000 vel a thawn a, heng zinga 4,000 velin thihna leh hliam an tawng tawh a ni.
Heng mi 4,000 vel zingah hian thah te, hliam te, an chin hriat loh leh man te an tel a. Sipai 4,000 vel zinga 1,000 vel hi January thla laihawla thah niin an ngai bawk.
Khawthlang ramten an sipai thi leh hliam tuar zat an sawi hi North Korea chuan a la sawi chhuak ve lo thung a. Hliam tuarte hi enkawl an ni em tih leh engtika mi nge tih te, thlak an ni em tih pawh engmah hriat a ni lo.
A zat hi dik chiah lo mah se President Vladimir Putin-a thawhpui, Kim Jong Un-a tan chuan chânna lian tak a ni a. Russia hian kumin kum tawp lama inkahhai puan mai a awm hma ngeia an ram china awm Ukrainian sipaite um chhuahpuiah a thawhpui hi a sawm a ni.
Ukraine hian nikum August thla atang khan Russian ram bung, Kursk hi a bei tan a, Russian ramri vengtute a barakhaih hle.
An beih tirh hian Kyiv chuan ram hi luah zui an tum lo va, nakina inremna a awm theih nana inbiak a awma chaw chaha hman an tum mai chauh niin an insawi.
Ukraine-in Kursk a luhchilh hi nawr kir hret hret a ni a, hei hi North Korean sipaiten October-a Russia an thlen atangin a ni tan.
Nawr leh then ni tawh mah se Ukraine hian Russia ram chhung ram zau tak a la luah a, an hmelma tan chuan chânna lian tak a ni.
North Korean sipaite hi a tha bik, Storm Corps-a mite an ni a, rei tak training leh inven dan pawh zirtir ni lovin indonaa tirh tawp nia sawi a ni.
“Russian officer-ten an hriat thiam loh dan angin mawlmang takin an zirtir a ni,” tiin British Army tank commander thin, Col Hamish de Bretton-Gordon chuan a sawi.
South Korean intelligence pawhin North Korean-te hi tun lai indonaa che chhuak turin an inbuatsaih lo va, Ukrainian First-Person-View (FPV) drone-in awlsam taka hmuh theihin an awm mai mai niin an sawi ve bawk.
Indo thiam lo mah se Ukraine-a sipai commander lawk, Gen Oleksandr Syrskyi chuan North Korean sipaite hi Ukrainian sipai hmatawng tan hna hautak tak an siamsak ve tho tih a sawi.
“An tam a. Sipai 11,000-12,000 zet, hma lam pan tura fuih phur an ni a. An chet dan hi Soviet tactic-a innghat a ni a, an zata innghah an ni a, beih a har ve viau a ni,” tiin general hian Ukraine-a TSN Tyzhden news programme hnenah a sawi.