UN-in Strait of Hormuz-a lawng hnathawk tangte sawn chhuak tan

UN International Maritime Organization (IMO) chuan US-Israel tang dun leh Iran indona tihtawp tura US leh Iran-in inremna an ziah hnuah Strait of Hormuz-a tangkhang lawng hnathawk 11,000 chuangte chu hmun hima sawn chhuah hna an thawk tan.
IMO Secretary-General Arsenio Dominguez-a chuan Thawhlehni khan thuchhuah siamin beihpui an thlakna hi ‘Iran, Oman, he biala tuipui kama ram dang zawng zawngah US leh tuipui lama industry te nen thawhhona tha tak neia kalpui a nih tur thu’ a tar lang.
“Himna tha tak a awm a tul tak zet tih kan hmu a, heng hnathawhnate thlawp turin him taka kal theihna tur a awm theihna turte pawh uluk takin kan finfiah tawh a ni,” a ti.
February 28-a US leh Israel tang dunin Iran laka indona an tan hnuah Tehran chuan strait hi a khar a, lawngte chu tuipuiah an tang hlawm a ni.
Kar kal taa inremna ziah a nih hnuah lawng kalte an pung leh tan a, Enr shipping intelligence agency chuan Thawhtanni khan sumdawng lawng 36 velin strait hi an paltlang niin a sawi a, indona tan atanga a tam ber ni a ni.
Omani defence ministry chuan thla tam tak chhung sawiho tawh, IMO ruahmanna hnuaia hna thawkte hmun hima sawn dan tur chu a tahtawla kalpui a ni dawn tih a sawi.
“Tun dinhmunah chuan insut mai pawh hlauhawm thei a nih avangin lawng kalna kawngte hi zawi zawi leh thunun chunga chhuahtir a ngai a ni,” a ti.
Denmark chuan Thawhlehni khan France leh Britain-in tuipui kawng pawimawh tak hawn lehna tura hma a lakna tura international maritime mission a neih chu an zawm tur thu a puang.
Hetihlai hian US Secretary of State Marco Rubio chuan Thawhlehni khan United Arab Emirates a thleng a, US nena inremna eng ang pawh siam se Iran-in strait-a toll (kal man) a lak phalsak a nih loh tur thu a sawi nawn leh.
“Khawvel huap tui kawng a ni a. Heng hmunah eng ram mahin toll emaw, fee emaw lak phal a ni lo,” a ti a, ‘he biala ram zawng zawng hian an pawm vek ang’ tih a rin thu a sawi bawk.
Tehran palai lawk ber, Mohammad Bagher Ghalibaf-a chuan a hma khan inep ramten inhawng reng tura inbiakpawhna line siam an remti chungin Strait of Hormuz chu indo hmaa a awm dan ang khan ‘a kir leh tawh ngai lo vang’ tih a lo sawi ve tawh thung.