Union minister of state for Law & Justice (independent charge) leh minister of state for Parliamentary Affairs & Culture Arjun Ram Meghwal chuan Pathianni khan Kolasib tlawhin, CSS (centrally sponsored scheme) hnuaia hmasawnna hnathawh hrang hrang head of office-te nen an thlir ho a, tlawmngai pawl leh CSS hamthatna dawngtu beneficiary-te nen an inkawm bawk.
Sawrkar department official-te nen an thukhawmnaah Kolasib bawrhsap John LT Sanga chuan an district dinhmun leh district chhunga sawrkar hmalakna langsar zual a report a. Department hrang hrang – Law & Judicial, RD, KVK, PHED, H&FW leh School Education department hotuten an department kaltlanga Kolasib district-a CSS hnuaia hmalakna an sawifiah a. Zawhna chhan a ni bawk.
Union MoS chuan Prime minister-in Union MoS-ten India hmarchhak state-te tlawh vek tur a tih tihhlawhtlin nana lokal a nih bakah sawrkar laipui hmalakna mipuiin tangkai thei ang bera an chhawr theih nan an mamawh ngaithla a, kawng kawhhmuh tura lokal a ni bawk tih a sawi. Mipui chu sawrkarin an tana ruahmanna a siamte hrechiang a, chhawr tangkai tum turin a chah a. Department official-te pawh mipui hamthatna tura sawrkar ruahmanna a nih dan taka chhawr a nih theih nan theihtawp chhuah turin a chah bawk.
Tlawmngai pawlte nena an inkawmnaah Arjun Ram Meghwal hi an pawl dinhmun leh hmalak dan an hrilhfiah bakah, mamawh an neihte an thlen a. Union MoS chuan a hnena mamawh an thlente chu a theih anga bawhzui sak a tum thu a sawi. CSS beneficiary-te leh self help group-te pawh kawmin, an hmalakna leh hlawhtlinna bakah hma an sawn zelna atana thil pawimawh a sawipui a ni.
Union minister of state-in CSS hnuaia hnathawh thlirpui
